發哥創15億人仔票房：關我咩事

影帝發哥主演的兩套賀歲片《西遊記之大鬧天宮》及《賭城風雲》，截至昨日已創出累計逾15億元人民幣的票房紀錄，相當巴閉！而票房收超過10.33億人仔（約19億港元）的《大鬧天宮》，更榮登史上最賣座華語電影第3位，至於《賭城風雲》（內地片名《澳門風雲》）票房亦達5.02億人仔，雖然發哥「自己打自己」，但兩齣賀歲片對打下，照樣創出輝煌佳績，證明了觀眾看發哥只嫌少、不嫌多，兩片更已決定乘勝追擊，邀發哥8月拍攝續集。

盡量遷就檔期

發哥對於創出票房佳績，則謙虛表示：「關我咩事吖！最重要係老闆開心，令投資者賺到錢，如果冇老闆肯投資，我哋食西北風咩？電影圈要多啲戲開，咁至多工作機會。」

據知，貴為影壇大忙人的發哥，今年早擬定接拍3齣電影，換言之，在密密麻麻的檔期中，再接拍《大鬧天宮》及《賭城風雲》續集的機會似乎不大，但他未有斷言拒絕，影迷仍有望再一睹發哥飾演玉皇大帝及石一堅的風采，發哥說：「《大鬧天宮》主角係孫悟空，玉皇大帝喺下集應該發揮唔大，因為孫悟空都去咗取西經，要唔要我都得，峰哥（王海峰）話8月開，睇咗劇本先，睇吓係咪用荷里活特技，努力睇吓就唔就到。（會接《賭城風雲》續集？）我同王晶、謝霆鋒拍戲的確好開心，但咁快就再拍續集，會唔會急咗啲？我諗隔一年會好啲噃！阿晶約咗我食飯傾，睇吓古仔先，睇咗劇本再睇吓檔期就唔就到囉！」

文：影視組