Jeana性感背後 感性獨白

時間過得好快，眨眼入行已有四年時間，其實我入行都好亂打亂撞，因為當年我做兼職模特兒，仲係一個「小朋友」，諗住乜都試下無妨，後來有幾間大公司都有斟我簽約，最後我揀咗依家個經理人Roy，因為我覺得佢思想創新和獨特，做事轉數快，唔同其他多規多矩嘅大公司。我同Roy可以話係一拍即合，大家都好清晰知道市場上定位，要做乜，想得到乜。

演「反派」突出自己

一入行我就被公司安排做「新八模」，當時我心諗係一件好事，因為一個女仔入娛樂圈乜都會好「怯」，諗住可以同其他七個女仔一齊，乜都可以有得分擔下，唔使獨挑大旗，我個心都會定啲。不過，公司好快就安排我獨立推出性感寫真集，我覺得成件事係個天賜畀我嘅，係一個機會。娛樂圈有好多女藝人，我個形象要好突出，所以當時我營造咗一副好寸嘴嘅形象去配合，言行要誇張、好爆，就好似演「反派」！我知我喺呢行唔係「天使」，亦相信娛樂圈唔係只得「天使」先會成功。如果我第一日入娛樂圈選擇做「天使」，係可以，但做唔到自己，我覺得做呢行係長遠嘅，要畀真實嗰一面人哋睇。

Jeana（左三）初以「新八模」出道時，樣子青澀。	放大圖片	Jeana直言已封伍詠薇為偶像。

學多門手技捽出新路

何佩瑜自認喜歡接受新嘗試，當年o靚模全盛時期，她又「坐唔定」希望搞搞新意思學打碟，她說：「我本身好鍾意音樂，當時成日落夜場宣傳，聽到現場有人打碟都好興奮，所以突然間有個念頭想去學打碟，結果花咗幾萬蚊買咗套器材返屋企搵人教，一學就學咗３年。其實我份人唔鍾意原地踏步，學打碟都總算學多種技能，自己又鐘意音樂，何樂而不為？」現階段單身的她，閒時已減少夜出，總是喜歡相約三五知己返家傾密偈，她說：「始終人都是會成長，剛入行時收入來得好快，自己亦沉醉喺購物上，買到一袋二袋，自己都有啲迷失。後尾自己醒覺到，錢搵得咁辛苦點解要亂花費？對自己一啲保障都冇！」

Jeana曾推出性感大膽的寫真集。	Jeana是性情中人，曾當眾被侮辱後回家喪喊。	Jeana與張柏文曾經深愛，可惜最後分手收場。

「天使」不是唯一

起初好多前輩同我講，走性感路線會喺市場有極端反應，有人會鍾意亦有人好反感，但我發現時代唔同咗，大家接受能力大咗好多，出到街好多女仔嘅打扮隨時比我仲性感，意味住大家可以前衞一啲去睇每件事，亦證明唔係只有「天使」先係最好。當然我都經歷過難受時刻，印象最深係有次搭港鐵，有個男人對住我講「好大咩？都唔係咁大啫」，又有人話我「得個胸冇內涵」，嗰一刻我真係有啲難受同委屈，返到屋企都忍唔住喊咗出嚟，我唔明點解呢個年代仲有呢種人，覺得自己唔受尊重，而佢自己亦冇尊重過自己！最後我諗通咗，問題唔喺我度，而係出言嗰一方，根本唔使介懷，「認真便輸了」。

封伍詠薇做偶像

其實我最擔心係家人因為我而聽到閒言閒語，佢哋係北京人又信佛，當日我話要出寫真，佢哋都唔算叫支持，仲問過我做乜着得咁性感，做乜說話冇分寸，我就解釋係公司幫包裝嘅形象。我圈內朋友唔多，同公司會有余曉彤（Hidy）、王雪瑩等等，而伍詠薇就係我好朋友，我哋合作電影而認識，佢份人好真好有義氣，我直頭封咗佢做我偶像！好記得初入行嗰陣，好多同行一見到我就避開，可能形象太酷，但識得我嘅朋友都知，其實我好單純。

唔主動 亦唔鍾意爭

圈入面好多人會直接叫我英文名Jeana，工作上好多人就會用「周秀娜師妹」介紹我。好多人問我每次同師姐周秀娜一齊出活動，焦點都係落喺對方身上，我會唔會唔甘心呢？我可以好肯定咁講，由入行到依家我從來冇呢個感覺，我份人唔主動亦唔鍾意爭，做好自己先係最重要。我好尊敬任何人，何況佢係我師姐。我好慶幸早前做了一個舞台劇，令我學識好多嘢，亦知自己喺娛樂圈嘅路向同目標：我好鍾意演出。喺廿幾歲就搵到自己嘅興趣，可能比同齡嘅人行快咗一步，係一件好事。

感情路上跌跌碰

感情路上我不算順風順水，入行後與拍拖四年的男友分手收場，始終佢唔明白我工作需要，或者我性感形象令佢承受好大壓力，但我覺得在事業上總要作出嘗試，既然大家條路唔同咗，迫於無奈都要分手。另一段就同半個圈中人張柏文拍拖，開始時大家真係好愛大家，好情投意合，每日都好似熱戀中，但可惜只維持到一年多時間，最終就是太了解對方而分開。我想講每段感情我都學到好多東西，我會好好記住，每一段經歷都是一個人生課堂。

口述：何佩瑜　

筆錄：影視組

場地：WIEN PRIVATE CLUB