霆鋒澳洲展廚藝服侍張家輝
影帝謝霆鋒將會把廚房搬到澳洲，在當地大展廚藝，服侍同為影帝的張家輝。這位型男廚神昨日揹埋私伙廚具現身機場，但全程生人勿近，更將經理人霍汶希（Mani）的手揈開。而霆鋒前妻張栢芝亦唔執輸，在新加坡一間餐廳做義工，更入廚客串煮兩味。
一向熱愛下廚的謝霆鋒，將會為浙江衛視的美食節目《十二道鋒味》進行拍攝，今次特輯由英皇製作，大隊會以澳洲作為第一站，在三個月內前往六個不同地方拍攝，第一站嘉賓會由張家輝打頭陣。
發晦氣揈開Mani
昨日下午五點，霆鋒經理人Mani聯同約20個工作人員現身機場，而主角霆鋒在半個鐘後帶住兩篋行李兼揹住裝着自家廚具的藍色長形背囊，戴住黑超的他全程黑面，就算Mani揮手示意霆鋒往她那邊辦理登機手續，他都有意無意行至相反方向，之後Mani走到霆鋒身後欲攞開其耳機與他交談，霆鋒意識到身後有人，卻看似發晦氣將Mani的手揈開。
搞完手續後，霆鋒秒速入閘，但心情開始好轉，問到他有關節目詳情，他笑說：「喺呢度講？你梗係新嚟。（諗好晒菜式未？）諗好喇。」入閘前有fans要求與霆鋒合照，他都大方接受。
而嘉賓張家輝在六點現身機場，他表明今次去澳洲hea遊：「我唔煮，諗住休息幾日，等霆鋒服侍，佢當初叫我去澳洲，我話可唔可以去澳門或者長洲，呢排工作好密，返到嚟又要開工。」家輝又講明會在節目中講真話：「我唔做戲，難食就會吐番出嚟。」提到成龍第三度做演協會長，他說：「有經驗都好，我唔係會員，但都係演藝圈一分子，只係唔太多表達意見。」
斟茶遞水夠落力
霆鋒早前飛到新加坡與兩個仔團年，而現已定居當地的前妻張栢芝，被網友影到於餐廳做義工，客串侍應的她幫忙宣傳兼下廚，更親自斟茶遞水，認真落力！而身穿運動衫的栢芝打工期間不時與員工傾到開懷大笑，看來生活過得相當充實。
文：音樂組