成龍當會長秋生熄火叫好

演藝人協會自曾志偉去年宣布辭任會長一職後，為新任會長人選四出張羅，曾親自約見過黃秋生、張學友等資深藝人，秋生當時爽快答應，還自組班底，率領呂慧儀、莊思敏等人浩浩蕩蕩踩上協會會址準備投票，未料被協會以不是會員為由拒諸門外，秋生氣憤難平即場地扮抽筋仍未被理會，此後秋生與秘書長陳芷菁展開隔空罵戰，雙方各不相讓，事件擾攘一輪後，秋生意興闌珊宣布棄選，令志偉大為頭痕，據知一度請求學友出任，但學友為免捲入是非漩渦，以工作繁忙為由婉拒。

終收服兩派

協會現有八百多名會員，當中分成少壯派及元老派，兩派經常意見分歧，志偉認為要由有分量之人才能駕馭得到，幾經游說下終說服到曾任會長的成龍出任，據知成龍見演協如此混亂，亦願意肩負重任重整爛攤子，故昨日經過三小時投票，通過九十多名會員投票下，成龍以大比數票數通過當選會長，兩派也表滿意，亦只有成龍如此重量級之人才令兩派信服！至於副會長由任達華、唐季禮、苗僑偉及肥媽擔任，陳芷菁繼續連任秘書長，身在英國的成龍雖然未能現身，但對新班子成員也感滿意。

曾志偉：「好咯，和氣生財嘛！」	黃秋生：「大哥出馬，我碌地沙贊成啦。」	演藝人協會昨舉行改選投票，當選具職銜的藝人來張大合照。

有份出席投票的志偉，透露自事件發生後，不少老臣子如學友、成龍等表現關心並提出意見，綜合各方意見均認為成龍任會長最為適合，志偉說：「雖然成龍成日唔喺度，今年委員加入新力量，可以迎合大家理念。（你之後會幫手？）我係永遠榮譽會長，會返嚟開會，只係冇投票權。」他對近日有卅多人入會感高興，更指秋生曾提出不少好理念，如電視台、電台等每間公司能夠有代表，多謝秋生給予寶貴意見，志偉說：「我會叫班新任理事作參考，希望佢出年再嚟。（怕唔怕成龍會失言？）唔會，有秘書處發言嘛。」

拎個心做事

而棄選的秋生昨日接受電話訪問，對選票結果感滿意：「選咗咪好囉，當選嘅都係德高望重人士。（志偉話遲啲同新任理事分享你之前提過嘅意見？）都係啲架構同規章，有好多嘢唔清晰、過時，唔好誤會我講啲老人家，我係講會章好複雜，如要做嘢快捷就要改。（有機會親自同班理事講？）睇情況。（幾時入番會？）其實我係會員，只不過有段時間冇交會費，至發生之前嘅誤會。（班支持者同你共同進退？）又唔好講到好似我搞事咁，自由參與，只要拎個心為業界做事就好！」

文：影視組