李璧琦擲六位數 再唱出局歌
李璧琦自資六位數於下周舉行處女音樂會，日前與樂團綵排時透露已經封了蝕本門。音樂會上李璧琦透露會再唱在《星夢傳奇》的出局歌《大會堂演奏廳》，她笑言仍有陰影感到「淆底」。
藝員李璧琦（Becky）憑參加無綫歌唱節目《星夢》歌藝一鳴驚人，廣被觀眾認識，本身是歌唱老師對音樂充滿熱誠的她最近自資六位數，並於本月23日晚上舉行「Sing夢成真音樂會」。日前她與約30人的管弦樂團綵排，她說：「音樂會一半係音樂劇、一半係流行曲，香港較少人認識流行管弦樂，喺美國就好流行，希望可以畀多啲觀眾認識。」
鄭俊弘做嘉賓
Becky在《星夢》因唱《大會堂演奏廳》失準出局，今次在音樂會中她亦會再唱該曲一雪前恥，她說：「講真再唱都會有少少驚，因為比賽係唱呢首歌而出局，但係要努力克服困難，希望表現好啲。」今次自資開音樂會的她被問到可會蝕本？她指已經封了蝕本門：「今次有好多對音樂好有熱誠嘅朋友幫手，好似音樂總監袁愛欣、樂團指揮吳庭光、大提琴家黃胤銘等等，飛又差唔多賣晒，所以唔使蝕錢。」今次Becky亦盡碌人情卡，邀請王祖藍與鄭俊弘擔任嘉賓：「祖藍對音樂劇好有熱誠，佢之前邀請我參加過佢搞嘅歌劇聚會，鄭俊弘就因為參加《星夢》一齊經歷咗好多，一搵佢就應承。」首度挑戰自己邊唱邊跳舞的Becky本身對音樂劇《雪狼湖》情有獨鍾，她更會唱出多首劇中歌曲好似《等了又等》、《原來只要共你活一天》等作出致敬。
採訪：影視組
攝影：秦健輝
場地：通利琴行
服裝：Sing＠Plotz
髮型：Cliffck.com