芷菁：佢係會長我退會
有意角逐演藝人協會（演協）會長一職的黃秋生日前被陳芷菁拒諸門外後，連日來「秋」後算帳與芷菁發炮開火！秋生昨日透露雖有滿腹大計將演協全面革新，但寸爆芷菁一人獨大兼搞大龍鳳，索性成全她做會長好了。芷菁亦揚言若秋生當上會長，亦會自行退會，實行有你冇我！
本報於周一獨家直擊有意角逐會長的黃秋生拉大隊到演協申請入會時，被秘書長陳芷菁請食閉門羹，不甘受辱的秋生在門外地示威。爆發內訌後，雙方連日來不斷隔空互寸。秋生昨接受電台訪問時稱本身無意角逐演協會長，但經王祖藍提名及曾志偉游說後才決定參選。
成立醬油會
躊躇滿志的秋生表明有意對演協進行大改革：「做嘅話我就會大刀闊斧改革，成件事要變，包括會員審批準則。（要大改革，有人唔想你做會長？）佢知我想改乜嘛？我會改一啲大家唔再做到嘅嘢，呢間嘢（演協）最初架構係StarEast咁，可以開Disco、老人院、咖啡室，又有股份制。（另起爐灶？）係呀，我哋搞咗個叫醬油會，嚟打醬油混吉既。咁其實醬油會同演藝人協會冇衝突，係一班後生仔由我呢個老人家帶領，開始時成立咗個chat room，有啲資訊性分享，再發展落去邀請其他人加入，做啲可以互相幫助嘅事，再大啲嘅可以做慈善籌款嘅事，咁咪去註冊囉。」
秋生稱未有人聯絡他下周繼續選會長，更寸爆芷菁獨大：「如果呢個人咁大權力就索性叫佢做啦！（陳芷菁？）咪就陳芷菁做囉！使乜搞咁多大龍鳳？」至於芷菁昨日透過短訊回覆：「很累，不再作回應，我從來都不想做會長。（秋生話做咗會長後，容納唔到你。）放心，佢做會長，我都會退會。」
邵音音封口
演協名譽理事邵音音連日在微博炮轟有人搞事，前晚她出席活動時見記者上前採訪，她即怪叫：「呀呀呀！」問是否有人叫她封口﹖音音姐否認，隨即匆匆入戲院。而演協會籍組組長梁珊對於黃秋生認為演協需要大改革，她接受電話訪問時說：「選到先講啦！舊制度行咗咁耐，改革好複雜，我就唔夠膽改喇。」提到秋生用「物體」來形容她，梁珊說：「我同佢未合作過，唔熟好正常，咁我的確係一個物體，講嘢要負責任，尊重自己尊重別人，讀者眼光係雪亮嘅。」
另外，有報道指秋生與內地女星魏璐於公眾地方作不道德行為，他連發三則微博否認：「若認為我真有在公眾地方進行不法行為，請報警，不要進行公審，不要傷害一個無辜的女孩。」
文：音樂組