克勤想唱荒誕歌公司唔buy
李克勤的發燒碟在巿場上有銷量保證，令他既開心又無奈，克勤坦言不想變口水歌手，希望在歌唱事業再尋突破，尤其演繹一些大膽、古靈精怪的歌曲，可惜唱片公司卻唔多buy。
八月才推出過發燒碟《復克》的李克勤，剛剛再推出EP新碟，克勤笑說：「原先8月張碟有新歌有舊歌，但灌錄安全地帶啲歌時，公司覺得好正，唔想影響完整性，就決定分拆上巿。」克勤直言隻發燒碟銷量好好：「早知咁好賣，又交到數，新碟就唔使做啲咁安全嘅歌啦。」
最鍾意古靈精怪
克勤坦言巿面上大部分賣得的唱片都是精選碟、翻唱碟，作為歌手很無奈，他說：「要有新歌先有舊，冇新歌將來點變成經典？總不能不停翻唱，咪變咗口水歌手，要搵到個平衡位。」
Wyman（黃偉文）寫給克勤的新歌《紙牌屋》乃他最拿手的情歌，克勤認為唱歌跟拍戲一樣，作為一個演繹者，首歌與自己有否切身關係並不重要，反而愈荒誕離奇就愈鍾意，他笑說：「唔係歌手唔想變，礙於巿場關係，大家有冇聽過古靈精怪嘅李克勤？我都想做一隻放開啲嘅唱片，起碼歌詞上可以大膽啲，但唱片公司唔畀我哋做。」
現代愛情太兒戲
克勤笑言跟Wyman看似風馬牛不相及，他們的交情不是來自服裝、踢波，而是來自一些美劇，他笑說：「我哋兩個都係電視精，《紙牌屋》都係一套美劇名。」但歌曲內容就講現代人談情不再像以前般山盟海誓，動不動就分手、離婚，克勤說：「每段感情都要雙方努力去堆砌，就好似砌緊紙牌屋，但推冧亦好易，希望聽完呢首歌大家冇咁易分手。」
克勤坦言兩個人相處絕非易事，擁有幸福家庭的他在愛情路上好順利，他笑說：「唔順利你唔知啫，同埋好快我就唔記得，只記住順利嗰啲。」
服裝：Hare by Collect point@Mira TST
髮型：Adolph Bow
場地：Regal Hongkong Hotel
文：音樂組