吳若希MV疑抄吳雨霏
星煥歌手吳若希（Jinny）日前拍攝新歌MV中的造型抄足吳雨霏年初舉行的演唱會海報，由於兩女都是找來形象指導馬天佑（Mayao）操刀，Mayao承認構思有點似，身為MV導演的Jacky與星煥老闆何哲圖異口同聲否認。
憑42吋白滑長腿俘虜一眾宅男的「若希BB」Jinny日前拍攝新歌《炊煙》MV，請來「翻版余文樂」導演Jacky及曾是吳雨霏（Kary）御用形象指導Mayao合作，Jacky急不及待上載一張Jinny拍攝時的黑白相到微博，相中Jinny造型激似Kary年初舉行的個唱海報，大家都是拖住巨型降落傘，湊巧地Kary拍攝海報當日都是找Mayao幫手，加上他曾有撞衫前科，將同一品牌毛毛裙分別給Kary及關心妍穿着。
導演強調全新創作
Mayao昨日在電話中說：「當日係我同事負責執衫，係導演話想我去睇吓同幫手，完全唔關我事。（構思似Kary個唱海報？）係有啲似，我睇到有啲驚。」星煥老闆何哲圖強調與Jacky合作十多年，他說：「導演有創作自由空間，個MV都未剪好，唔好憑一張相就斷定係抄，等剪好晒播出街先比較啦。」而身在台灣的Jacky否認說：「係想做水母感覺，完全唔係抄襲，MV之後會加水母效果。」他強調不會刪走部分鏡頭：「點解要Cut？由頭到尾唔係咁意思。」
降傘扯起倒地受傷
此外，吳若希昨日到小學出席活動，表示近日忙於拍新歌MV更發生意外受傷：「我有個一個造型係揹着降落傘，一開大風扇嘅時候我成個人畀降落傘扯起，之後成個人跌落地，手肘、大腿都受咗傷。」
文：音樂組