肥溫凸襲城城新歡(目及)到實

琦溫斯莉以浪琴表優雅形象大使身份首度訪港，旋風式在港31小時，昨日她出席沙田馬場舉行的首屆「浪琴表香港國際賽事」，她以火紅色貼身透視連身裙上陣，肩膊、腰側至背部均若隱若現，真空上陣的她更以激凸饗客。

請肥溫睇《寒戰》

期間肥溫與維珍航空老闆的外甥男友Ned RocknRoll在沙圈看馬，同場遇上品牌另一優雅形象大使郭富城（城城），二人首次見面惺惺相惜，言談甚歡，二人又與品牌的總裁大合照，Ned即識做地企在一邊，不過視線就未有離開女友。兩位巨星碰頭吸引沙圈內的馬主包圍拍照，場面墟冚，拍完照後，Ned即拖實女友返回廂房。之後肥溫再次現身頒發紀念品給勝出第八場賽事的馬主、練馬師及騎師，有馬迷在台上大叫她的名字，肥溫即笑笑口向觀眾揮手，表現親切。

兩位形象大使碰頭，城城與肥溫傾得相當投契。	當肥溫與城城傾偈之際，Ned（箭嘴）的目光依然緊盯女友。	琦溫斯莉吻賀得勝的騎師。

城城對肥溫也讚不絕口，他說：「由《鐵達尼號》開始已經係佢粉絲，直到佢攞奧斯卡獎，佢嘅演技真係冇得頂，係個好多變化嘅女演員。我好期待見佢，想請佢睇我做嘅《寒戰》。我想同佢一齊拍品牌嘅廣告，今日會見到品牌老闆，會同老闆傾一傾。」

城城愛駒鎩羽而歸，與肥溫一齊拉頭馬的願望落空。

肥溫為醒獅點睛，並好奇那些「生菜」是甚麼意思。

另外，城城的愛駒「愛的呼喚」昨日出賽僅得梗頸四，輸給第三名、曾志偉的愛駒「卡加大師」，城城坦言感到若有所失：「不過唔緊要，賽馬運動有贏有輸，要結合天時地利人和，今日因為個騎師過唔到磅，臨時改咗另一位，可能個騎師同隻馬唔係咁熟，希望馬迷包容，隻馬只係第三次比賽，好多朋友都有傳短訊畀我話可惜同鼓勵我。（包括女友熊黛林（Lynn）？）冇。」

好奇採青乜東東

現身馬場前，肥溫出席品牌銅鑼灣旗艦店的開幕活動，擔任剪綵嘉賓，吸引半百巿民圍觀，肥溫全程笑容十足，不時向巿民揮手，期間她見到舞獅採青，好奇地問旁人箇中意思，對中國文化表現出濃厚興趣。肥溫透露前晚在船上欣賞了幻彩詠香江及在酒店品嘗地道美食，可惜未有時間四處逛逛，她大讚香港是個美妙城巿，希望有機會再到訪。提起城城時，她說：「我之前未見過佢，有人同我講，佢好紅好出名，知道佢隻馬會出賽。（佢話想同你一齊拉頭馬。）好呀！希望佢隻馬會贏。」早前肥溫獲英女王頒授CBE（大英帝國司令勳章）銜頭，她直言：「冇諗過作為演員可以得到呢個榮譽，英女王皮膚好靚、好友善、好優雅又好健談，我哋有傾偈，能夠同佢見面係真正嘅榮譽。」

肥溫與男友約五時多離開馬場直返酒店，二人手拖手落車，並於昨晚乘夜機返倫敦。

文：外娛組