閃爆燈
閃令令的造型向來深得女生偏愛，無論Bling Bling、Glitter，還是Glossy的服飾，今個春夏都非常流行。在各大時裝設計師的春夏系列中，不難發現喱士加閃閃，或雪紡加閃閃等元素，像陽光般燦爛耀眼，充滿夏日氣息，十分Eye catching。不過閃閃服裝一定要小心穿着，因為很易令人顯得肥胖，效果就如同穿白色一樣，並不容易Carry，可以閃出型格，但萬一不小心配襯，就會變得娘味十足。名模陳嘉容就大讚莊思敏的閃閃Look散發女性嫵媚，徐濠縈則潮味爆燈。
莊思敏
同佢平時嘅打扮風格唔同，令人眼前一亮，好有女人味。一頭紫髮，襯番個紅唇，散發出一份女性嘅嫵媚。
Janice Man
如果除咗件褸會靚好多，入面襯得幾好，成個Total look都幾靚，好Girly，有型格，幾特別。可惜件褸畫蛇添足，即刻扣分，嘥晒。
張靜初
娘娘哋，嘥咗佢脫俗嘅氣質，顯得佢肥咗，有少少腫脹，條裙着到佢冇晒腰形，所以Cutting好緊要。換對有珠片嘅簡單款黑色高踭鞋會好睇好多。
徐濠縈
好有型格、好靚，係潮、閃同型嘅代表。一身打扮嘅Focus喺對襪度，令成個Look型晒靚晒，如果冇咗對襪，就咁襯對高踭鞋，會好普通、好女人，加咗呢對襪即刻唔同晒。
江若琳
幾靚，幾有少女味，啱佢嘅Image同年紀，出席隆重嘅Cocktail都好得體。如果冇咗條Belt就會顯得佢冇咗條腰，加咗條Belt令線條出晒嚟。
劉亦菲
超娘，係失敗之作，其實件外套同條裙都靚，分開嚟着會好好睇，擺埋一齊唔Match。同埋唔好要條頸巾，依家咁着太似聖誕樹，令人眼花繚亂。換對米白色鞋會清麗啲，啡色對亞洲人嚟講比較難Carry，好易顯得老。
徐子珊
好唔得，嘥咗件衫，毫無時尚感，都幾娘，個髮型都唔襯，太斯文。如果唔着長裙，換條Hot pants，再襯對型格款嘅Platform鞋，會靚好多。
陳嘉容Profile
香港著名模特兒，曾為各大國際品牌行時裝騷，在時裝界打滾多年，對時裝方面的認識無論是理論或是實戰都難不到她，近年更為電視時裝節目擔任主持，化身Stylist教人配襯衣着打扮。