張嘉兒生意做上癮升呢女強人

嘉兒由入娛樂圈至今的緋聞少之又少，除了傳過林敏驄，最為人熟悉的莫過於與金剛的緋聞，不過二人卻沒有因此而避忌。

當時真係唔知點解會同林敏驄傳緋聞，仲要做埋雜誌封面，因為我淨係上過佢《三個女人一個墟》節目兩次。而金剛呢？我哋就真係好朋友，加上我哋又係啲唔會避忌嘅人，會一齊出街，所以先畀人誤會。

張嘉兒與金剛懶理緋聞，繼續交往。（資料圖片）	張嘉兒與林敏驄因《三個女人一個墟》而傳出緋聞。（資料圖片）	張嘉兒性格樂觀，對負面新聞一笑置之。

金剛襯小儀

我好記得有一次同金剛一齊坐公司車返屋企，點知落車嘅地點係一樣，先發現我哋係住同一個屋苑，跟住我哋就愈來愈熟，我哋嘅緋聞就傳到依家。

張嘉兒與兩位外籍好友合辦教育中心，搞得有聲有色。

張嘉兒參選港姐，原因一個「貪」字。

金剛份人幾搞笑，佢亦好肯教人，之前我接MC job，佢都畀咗好多貼士我！佢個人好貪靚，好肯花錢買衫！其實我覺得佢同小儀都幾襯，因為佢哋都係好得意同搞笑嘅人，如果佢哋結婚，個家庭應該會充滿笑聲。

至於自己嘅擇偶條件，我就鍾意開朗嘅男仔，我唔鍾意畀任何負能量影響我，同埋我鍾意啲運動型嘅男仔，如果佢識得滑水、滑雪，就好容易吸引到我。

辦學感滿足

我兩個教西班牙文嘅朋友，識得好多學生，我哋都問自己點解唔去搞生意？之後我哋就決定分工合作，我負責做宣傳、行政同教材，佢哋就負責教學。加上佢哋係老闆又係老師，人工會慳咗一大截，所以我哋就係咁開始合作做生意。

有意開餐廳

我以前真係冇諗過會搞生意，因為成日要管嘢，覺得好煩！不過依家做生意就覺得好過癮，雖然責任好大，但係當諗到盤生意屬於自己，滿足感好大。我成日都覺得呢一間學校係我嘅BB，好希望可以培育更加多學生。而我對做生意亦開始上癮，有時會諗可以開一間餐廳都唔錯喎，希望可以擁有更高更大嘅成就。

負面報道 自我調節

當選冠軍受到很多負面抨擊，相信並非一般人能接受到！不過樂觀的嘉兒懂得心理調節，勇於面對人生！

當時又唔係真係太晴天霹靂，因為工作已經排得密麻麻，每次見到啲報道都未停落嚟消化，有一種「煮到埋嚟就食」嘅感覺，完全冇時間諗其他嘢。直到一年之後，做完晒好忙嘅嘢之後先發現，原來啲人曾經咁樣講過自己，都有少少唔開心。

我係一個幾開朗嘅人，會識得為自己做心理調節，雖然人哋對我有啲負面批評，但我同自己講：「我有好多人錫，我又外國大學畢業，然後又有七個best friends，身體又健康。」其實我對生命中所發生嘅事情都好滿意，唔應該為咗一樣唔滿意嘅嘢令到自己嘅人生咁唔開心。

一時貪心 參選港姐

常常有人說：「想入娛樂圈就參選港姐啦！」不過對於嘉兒來說，最初參選港姐卻是因為一時貪心。

參選港姐真係一時貪玩，當時溫哥華有海報寫住「香港小姐」，心諗如果入選咗就可以代表溫哥華返香港參選，仲有一張免費來回機票！就係因為有少少貪心，所以我就報咗名參加。

本來參選真係諗住玩，識吓朋友，唔使搵嘢做住，但點知贏咗之後就完全唔係玩，我嘅身份亦都代表咗香港，所以我要好認真咁履行我職責！參選港姐之後，我代表香港參加世界小姐，當時仲意外地贏咗「愛心小姐」！因為喺一個國際性嘅比賽可以代表香港贏到獎項，真係人生好大嘅獎勵！

口述：張嘉兒

筆錄：文珊

攝：黎志輝

髮型：Just Ko@Sigo

場地：Columbus Culture & Language Centre