Crystal Winkie誓保HotCha招牌

沒有Regen的日子

Winkie：記得Regen啱啱離開HotCha時，我真係好唔慣、好唔捨得，成日匿喺屋企喊！Regen專登打長途電話返嚟安慰我、鼓勵我，同我講大家都係同一條路行，佢只係去進修，或者好快就會返。經佢開解同時間慢慢適應，我心情先至可以慢慢平復落嚟。始終大家相處咗四年，一下子唔見咗佢，感覺就好似親妹走咗一樣，掛到心肝都甩埋！

壓力大嚴重失眠

Crystal：我最辛苦、最困難嘅時候，就係Regen啱啱走嗰段時間。真係好大壓力，令我嚴重失眠，加埋我要同Winkie做舞台劇，多嘢做搞到自己好多嘢諗，成日都胡思亂想，擔心冇咗Regen，我哋之後嘅路要點走？呢段算係我人生黑暗期，我好感激身邊朋友鼓勵我。原來一個人喺最唔開心嘅時候，朋友會幫到好多，當然仲有公司嘅輔導，安撫我哋唔好咁擔心，每樣嘢都畀信心我哋。我真係要同Winkie講聲多謝，佢個人好樂觀又成日笑，帶畀我好多正能量。依家我適應咗冇Regen嘅日子，心情開朗番，有咗明確嘅目標。

日後Regen（左）學成歸來，會與Crystal（中）及Winkie以HotCha之名繼續出碟，不令粉絲失望。	兩女憶述Regen離隊情景，即面露愁容。	Winkie一有時間就睇電影，希望從中吸取演技。

踩過界瞄準影壇

Winkie：我聽到出面好多人以為Regen到外國升學，只得兩個人嘅HotCha就唔會再出碟，其實全部都係誤解！我哋仲預計出年暑假期間，繼續以HotCha名義出唱片。雖然我哋兩個會作多元化發展，但好肯定喺音樂上，HotCha係會繼續。我本身好鍾意演戲，今次我要同Sa爸（蔡卓妍爸爸）講聲多謝，佢請我拍電影，畀咗演戲機會我。拍完先知，原來內地同香港及台灣拍劇文化分別好大。講真我係新人，第一日開工真係唔知導演要乜，但佢好有耐性教我，叫我返酒店睇多啲唔同嘅電影。我真係有聽佢話！五日四夜行程中，不停咁上網睇電影，晚晚通頂。除咗拍劇之外，我對時裝都好有興趣，公司鼓勵我喺呢方面發展，打算幫我傾拍一輯有關時裝同旅遊嘅節目。

Regen出席最後公開活動時泣不成聲。	Crystal慶幸有同事及朋友鼓勵，對前途重拾信心。	Winkie與Crystal承認做藝人表面風光，但暗地裏有苦自知。

出書填詞做才女

Crystal：我會繼續出書，上次我本處女作賣得好好。公司支持我喺明年三、四月再出新書。今次故事大綱都係圍繞住啲古靈精怪嘢，不過會偏重多啲愛情。雖然好似好趕咁，但我早已有晒構思，只係欠落筆。我承認出第二本書承受嘅壓力更大，但我信心大咗。寫書外，我仲會同Deal（莊冬昕）合唱一首新歌叫《我想打畀你》。仲有，我會嘗試填詞，做個唱作歌手。

Winkie（右）與Crystal曾參演電影《絕代雙嬌》，戲份雖少，但兩女都落力演出。

Crystal今年書展曾出著作，銷量不俗。

入行屢遇壞桃花

Winkie：入行後我從未遇上真命天子，雖然每年都有兩、三位條件唔錯嘅男仔追我，可惜全部係壞桃花。曾經有圈中人問我係咪鍾意女仔，我梗係鍾意男仔啦！可能之前我同女歌手李卓庭傳過斷背，所以啲人誤會咗。

Crystal：我都係入行後先冇拖拍，其實我都想拍拖！講真，之前都有啲男仔暗示對我有好感，佢哋會成日不停send短訊，做啲over朋友會做嘅嘢，令我以為大家可以發展吓，但原來佢唔係想追我囉！

筆錄：音樂組　 攝：司徒國榮