方便中門彈開 Alice B.驚爆如廁樣

人生路上總有最尷尬的時候，就算形象光鮮亮麗的明星們，亦不例外，他們的尷尬事也會跟令人難以啟齒的「屎尿屁」有關。平日潮爆的蔡卓妍就試過玩捉迷藏時忘形瀨尿。模特兒Alice B.就大頭蝦如廁時忘記鎖自動門，結果門彈開，就畀人見到她沒遮沒掩地坐在廁板上！

Alice B.「我試過同朋友坐火車，去廁所嗰陣唔記得鎖門，原來嗰道係自動門，一撳掣就打開。我朋友唔知打開咗道門，見到我坐喺馬桶，雖然係朋友冇乜所謂，但附近仲有其他人喺度，希望冇人見到啦。」

松岡李那「最尷尬係出席活動時喺台上面『戟』親，條裙翻起咗，畀人見到條底褲，仲要係第二日喺報紙度見到張相！」

李蘊「試過行騷時唔記得拉褲鏈，第二日上網睇番啲相，好彩睇唔到咩嘢嘅，而且冇人提起，所以都冇問題！」

古天樂「上台唔記得拉褲鏈，記者話番畀我知，其實都唔止一次發生啲咁嘅事，所以有時喺台上都會用手check吓。不過有時係褲鏈自動跣落嚟，呢啲真係冇計。」

蔡卓妍「我細個嗰陣，一緊張會瀨尿，試過玩捉迷藏時，可能太投入，所以瀨咗尿。不過我唔敢認，立即行開扮唔知！」

何倍倩「試過去食嘢唔記得畀錢就走，因為我掛住諗嘢，點知餐廳嘅人追出嚟要我找數，好尷尬。」

官恩娜「有次喺台上表演，高跟鞋個踭卡住喺台中間，當時表演緊快歌要跳舞，諗住掹出嚟都唔得，惟有踎低用力掹，仲好多人睇住添。」

Rosemary「最尷尬就係上年關於我涉嫌藏毒嘅報道，不過我好好彩，有好多朋友同家人支持。依家已真相大白，希望大家可以judge me correctly。」

傅嘉莉「我覺得最尷尬係叫錯人哋個名，所以依家每識一個朋友，會喺心裏大叫佢個名幾次。如果真係唔記得，就靜靜問番同事，或偷聽人哋叫佢咩名。」

陳沛嘉「第一次去意大利行騷，佢哋要我哋真空上陣，嗰時覺得好尷尬，因為喺香港點都會有得打底或墊pad，如果喺香港要咁做，我真係接受唔到囉。」

方便中 門彈開 Alice B.驚爆如廁樣