黃貫中陳偉霆用口互砌
黃貫中（Paul）、陳偉霆（William）因同愛上泰拳而結緣，雖然兩人年紀相差21載，但細一截的William卻自愧不夠Paul吸引，大爆師兄鋼條身形迷死女，而Paul則反爆William有男仔（目及），同門師兄弟唔出手，用口互「砌」！
黃：黃貫中 陳：陳偉霆
鋼條身形──靠嚇？
黃：我之前喺九展開咗演唱會，你有冇嚟睇呀？
陳：我因為要返內地做嘢所以冇嚟，但我家姐、阿嫂都嚟捧你場，我成家都追星架。
黃：可惜師傅（有香港泰拳宗師之稱的陳德興師傅）唔得閒嚟。
陳：其實我第一次見你唔係入行後，亦唔係喺拳館，我家姐同阿嫂係你瘋狂超級fans，所以第一次見你係喺03年，嗰次係跟家姐睇Beyond演唱會，我阿嫂個樣仲有啲似朱茵（Paul女友）添架。
黃：你家姐好得意就真。
陳：你真係好多fans嘅，記得我第一次上拳館時，有兩個女仔望住個擂台不停咁踩單車，初時我都覺得奇怪，再望真啲，原來你喺擂台度打緊拳，嗰兩個女仔就係咁望住你不停咁踩單車，你打幾耐，佢哋就踩幾耐。
黃：係咪真呀？哈哈哈……我唔知喎，我練緊拳邊理得人哋望呀？唔通我插盲佢哋對眼咩？佢哋有交學費，鍾意踩幾耐單車都得啦，我唔會覺得唔自在架喎，可能我厚顏啩。
陳：其實我都幾失望架，都冇人望我。
黃：你打沙包時，連男仔都望你，係你唔知啫！
陳：佢哋想打我咋啩。
自嘲樣衰輪住「猜」
黃：但我哋未試過喺擂台度對打過喎。
陳：邊夠膽同你打呀？你成日喺拳館除晒衫，用鋼條身形兇人。
黃：通常見到啲女仔，禮貌上都會着番件衫，因為師母會鬧架，但着咗衫啲女仔冇報名就走，所以我同師母講我幫佢搵客咋。話時話，我同你舊隊友Steven（張致恒）有對打過，但佢怕癢又怕痛，篤一篤佢就鬼殺咁嘈，好搞笑。
陳：我梗係唔夠你打啦，你學過5年，我都係呢1、2年學番啫，我鍾意上拳館係貪佢冇冷氣，嗰度又多架生，可以舉鐵。
黃：有冷氣做乜gym啫，一滴汗都唔出，就係講上拳館嗰條樓梯，上到去都氣囉氣喘啦，最好攞嚟練氣。有時夜晚師傅唔喺度，我會「猜」人囉。
陳：我都會搵班師兄弟對打吓。
黃：如果玩對打，個個排住隊嚟同我打啦，個個都想「質」我嘛，可能我樣衰囉，不過就唔會打到口腫面腫嘅。
陳：有冇試過打拳受傷？
黃：有次我踢沙包，踢到成塊腳甲飛咗出嚟，師兄弟叫我搽啲藍藥水頂住先。等好番啲，就用個鉗數123掹埋剩番少少嘅腳甲出嚟，嗰吓超爽、好high！
陳：哈哈，所以我點夠膽同你打呀，我玩對打就未試過受傷，啲師兄弟好錫住我。
打拳學懂修養
黃：有人覺得打拳好粗暴，我就絕對唔認同囉。
陳：我都同意，其實打拳先學到修養，拳館好多規矩，你見到師兄弟要好有禮貌咁同人say hi，走時要講bye bye，人哋幫你練拳，一定要講唔該，冇禮貌會畀師傅鬧，仲可能畀師傅踢出拳館。
黃：如果冇禮貌，仲會畀人掟落街添，有啲人誤會學打拳係爛仔行為，我就覺得如果咁有恒心去鍛煉自己身心，就唔會變爛仔啦，學拳時會明白到拳腳會傷害到人，咁就更加唔去打交。
咬牙鍛煉意志
陳：我本身都有禮貌，不過我覺得自己意志力未夠強，以前覺得自己好大力，但喺擂台打幾個round，就feel到個肺快爆，先知自己唔係想像中咁掂。
黃：呢種鍛煉意志嘅方法，對做人好大幫助，學識無論幾辛苦都好，都要咬實牙關捱過去。
音樂跳舞互交流
黃：我哋喺音樂上或者有機會合作吓喎。
陳：我《尾巴》嗰隻碟，原先係諗住搵你一齊玩，將band sound crossover跳舞，可惜就唔到期，你又唔係咁易請得郁。
黃：唔好咁講，只係大家夾唔到啫，但我唔排除繼續落去。
陳：你有冇諗過喺演唱會跳舞？
黃：等我再練好啲先啦。
陳：你講過好想學跳舞喎？
黃：其實我係顧住其他人嘅飯碗咋，我怕跳得勁過頭，人哋無得撈，哈哈哈，不如你教我跳舞，我幫你錄音。
陳：嘩，哈哈…。
黃：我十幾歲o靚仔時，書包長期有兩套衫，係方便我去完第一間disco跳濕咗，跟手換衫再去第二間跳過，嗰時好興着馬褲襯露趾鞋，加埋襪套，我估呢個造型依家都OK。
陳：係呀，依家興番。
黃：嗰時我一放學就會約人喺東方皇宮出面棵樹等。
陳：東方皇宮係咩嚟架？
黃：夜總會囉。
陳：哈哈哈，咁有冇人讚你跳舞勁呀？
黃：冇架，自己讚自己，或者逼人讚我囉，我真想學跳舞，所謂做到老學到老嘛。
陳：嘩……雖然我咁講好似好假咁，但你真係有跳舞潛質喎。
黃：釋放自己就可以跳舞，香港人就係怕醜，明明個心好想跳，就係怕畀人笑，所以撳住自己，好似喺騷度叫啲人跳舞，佢哋梗係望吓隔籬嗰個人先。
陳：絕對係啦，香港同美國嘅跳舞文化真係好唔同，以前喺香港clubbing，就算啲音樂有幾咁爆，首歌好鍾意，啲人個身都係郁少少，但喺美國有少少音樂已經郁到要爭位啦。
黃：唔釋放自己嘅人，係唔可以從事創作工作，我嗰種郁，可能啲人會覺得唔自然，但呢啲係我自己嘅步法，令自己覺得舒服。
陳：每個人跳舞都有佢嘅style，好似我跳rock dance就會好怪，我揸住結他係咁chok亦可能會畀人掟嘢咁囉。
採訪：音樂組 攝影：黃叔榮 場地：DOGside cafe 化妝：Jonathan@MOD Academy（黃貫中） Khaki（陳偉霆）
髮型：Niki Lee@Headquarters（黃貫中） Davy Yu@Chin.G（陳偉霆） 服裝：AFFLICTION（黃貫中）