吳雨霏豬膽鼻離奇變直
近年多位前Cookies成員傳出整容，初入行被評為「醜小鴨」的吳雨霏（Kary），近年亦加入「整餅族」，豬膽鼻突然變直、鼻頭肉亦削細，不過Kary堅稱自己是賣聲不賣樣，冇需要整容，笑言是自信令她變靚。
近年變得愈來愈索的吳雨霏，今年初完成紅館「處女」演唱會後，向公司請了近一個月長假，並飛往美國睇舞台劇，更將相片上載到微博。記者翻查紀錄，將Kary微博上的照片與她早年的照片對比，發現其鼻樑突然變直，鼻頭亦不再「豬膽」。忽然變靚的Kary昨日否認整容，當記者讚她是靚女，Kary即說：「咁咪好囉，入行九年終於有人話我靚。」
柏豪接受唔到
對於鼻樑變直，Kary說：「冇可能，係咪角度問題？當年有睇相佬話我個鼻好正同有福氣，叫我千祈唔好搞，鼻頭多肉將來會旺夫同有錢。（接唔接受整容？）入行時曾經有諗過，但我都係賣聲不賣樣，最後冇整。」Kary坦言近年多追求者，她說：「行出嚟自信咗，唔可以講靚，係順眼咗。」
曾被指整容的「餅女」鄧麗欣、區文詩及傅穎均力撐Kary沒有整容，三人均異口同聲表示是化妝變靚。而Kary緋聞男友周柏豪維護對方說：「靚係自然嘅事，冇可能愈嚟愈醜，唔信佢會整容。（接唔接受女友整容？）接受唔到，最多係箍牙。」
文：音樂組