Baby唔畀曉明嚼完鬆

Baby與經理人Kim及導演陳國輝共投資七位數字開設主題餐廳，內裏餐單與牆身布置均放有她的女僕造型照。昨日，Baby為主持試業現身，吸引大批fans在門外支持，問到Baby有否給予意見？她說：「食物同裝飾都有一齊傾，自己好鍾意食日本菜，大家又好鍾意法國地方，於是日本同法國菜加埋一齊！」

開餐廳唔會餓親

Baby笑言雖然自己廚藝不好，卻不是地獄廚神：「我鍾意食嘢！（好彩唔係你煮？）係，開咗呢間餐廳我就有機會惡補吓廚藝。」問到有否下廚給男友黃曉明？她沒有正面回答：「有機會想煮畀大家食！（會唔會請曉明嚟食？）暫時冇呢個計劃，我怕要請佢就蝕，總之佢要自己畀錢食。」

黃曉明	Baby表示今次有參與餐廳內的布置。

她又表示該餐廳是自己第二檔的投資生意，被記者取笑是小富婆的她會否再投資另外的生意？她笑不攏嘴說：「多謝大家支持，總之順其自然，依家開餐廳唔怕會餓親！」

撇清彭于晏緋聞

雖然日前曉明在港，但Baby表示早上才從台灣回港，無緣見面，至於幾耐冇見曉明？她不停尷尬地笑：「我好耐冇返香港！」記者篤爆她曾在大陸機場與曉明見過面，她以雙手遮面表示：「我乜都聽唔到！（你喺台灣否認與彭于晏戀情係咪打破分手傳聞？）我除咗工作以外，生活都好開心，多謝大家關心。」

此外，Baby日前在台灣出席護膚品牌活動，全程避開記者對曉明的提問，卻報以尷尬的甜笑，至於問到另一緋聞男主角彭于晏入圍金馬獎？她似是劃清界線地說：「我哋拍完戲後就好少聯絡，不過如果佢真係攞到金馬影帝，我就以行動表示，去佢屋企所開的餐廳食飯。」

文：名人組