諸葛輕鬆嫁 Amanda喜晒火
名模Amanda S.與諸葛梓岐各自找到好歸宿，將於年內結婚，昨日二人為時裝品牌行騷時，不時在後台密密分享籌備婚禮心得，不過同人唔同命，諸葛結婚就獲公主級待遇翹埋雙手等嫁，Amanda則搞到為請飲與男友「小吵」！
諸葛梓岐與Amanda S.昨日為時裝品牌Marella行騷，原來Amanda近日為了開餅店而病倒，她說：「因為裝修好多塵，所以唔舒服。」問到近日是否太忙所以消瘦？她說：「上年仲瘦啲，最近肥番少少啦！」
大家族意見多
Amanda表示在後台與諸葛分享籌備婚禮心得，她說：「我同佢講，請飲嘅嘉賓名單就最易同男友鬧交，所以要小心！」她透露自己與男友家族太多人，曾為請飲名單及請幾多人等問題與男友鬧交。而她表示結婚將在香港註冊，意大利及台灣擺酒，她說：「我婆婆行動不便，唔可以搭好遠飛機，所以要喺台灣擺酒，希望畀佢見到我着婚紗！」
禮服自己話事
相反諸葛表示沒有因請飲問題而鬧交，她說：「我哋唔會有呢樣嘢！」原來她不需為籌備婚禮費神，她說：「由男友統籌，佢搞掂晒，畀我可以專心工作，佢話到時我打扮得靚靚出席就得！」至於婚紗方面？她說：「如果有麵包超人嘅元素都幾好。」至於會否叫男友扮麵包超人？她說：「都好！咁樣會幾得意！」她稱禮服部分希望由她自己包辦，她說：「佢冇得揀。」