陳鍵鋒江若琳火爆友情

吵鬧暖場 愈爆愈多

江：江若琳 陳：陳鍵鋒

江：同你喺劇集上面，合作過兩次，你覺得我有無咩改變？

陳：哈哈，乜我識你架？

江：係係呀，我要同你經理人投訴，我同你拍劇嘅時候，你將啲花生殼放喺我嘅化妝袋裏面，等我返到屋企先發現袋底有好多花生同花生殼。

陳：我用心良苦呀，知道你返屋企想食嘢，一開化妝袋見到咁多花生，就可以慢慢剝嚟食，不知幾開心！

江：好記得當時仲要幾日後先發現，好彩無漚蟲咋，你仲試過將啲花生塞入我件衫度添！我爆完你啲嘢，畀個機會你講番我嘞。

陳：（繼續開玩笑）我覺得江若琳好好，好有內涵、好斯文，我好公道嘅，有嗰句講嗰句。當年我同你拍劇，你嘅對手（指《學警狙擊》吳卓羲）同你好好，我點敢同佢講嘢吖！

江：你咪亂噏，我唔鍾意唱Ko架！之前夠有網友傳我哋嘅緋聞啦，真係得啖笑！不過，當年我唔係咁識處理，喺公開場合你主動叫我影相，我當時覺得合照只會令啲緋聞傳得更熱，你就同我講：「怕咩啫！又唔係真。」之後，你仲玩番啲網友，喺微博度寫「人爆不如自己爆，一日一爆等你無得爆。」又教識我一招嘞。

陳：你係咪想讚我好聰明呢？

江：夠嘞！BoBo stop！

陳：人哋唔知點解我叫BoBo喎！

江：BoBo呢個名喺我改嘅，因為喺《洪武三十二》裏面，佢叫三保，加上我同佢喺戲入面由細玩到大，所以就親切啲叫BoBo。

陳：都唔明點解同啲對手合作第二日，就幫人改花名，除咗我仲有「乾髀罅」！

江：係呀，「乾髀罅」係袁偉豪嘛，因為佢喺戲入面叫李景龍，令人想起一間移民公司廣告，佢哋有句對白類似「岡比亞」居留權，咁咪叫咗袁偉豪做「乾髀罅」囉，BoBo個名好成功，拍到最後個個都叫你做BoBo。

陳：呢個名，直頭令我聞名於世，不過我啲fans都好受落，成日都咁叫我。

「鍵鋒」的由來

江：你好似仲有一個花名叫阿苗喎。

陳：係，因為我嘅英文名叫Sammuel嘛。

江：陳鍵鋒好似唔係你嘅真名，點解改藝名？

陳：我之前做DJ，有前輩教我改個藝名，咁我做啲私人嘢嘅時候，例如銀行理財咁，都會方便啲。

江：咁邊個幫你改「鍵鋒」呢個名架？

陳：同朋友傾偈傾出嚟，當時覺得不如改個鏗鏘啲、響啲嘅名，最後就揀咗「鍵鋒」。

江：當初點解由DJ轉去做藝員嘅？

陳：好簡單啫！因我可以同我兒時偶像江若琳拍戲嘛，我細細個就睇你拍戲，當年我好鍾意你啦、周慧敏、楊采妮啦，好想同你合作。

兩次面試失敗：我冇潛質

江若琳畀陳鍵鋒激到唔知好嬲定好笑，遂出動「連環槌」笑打陳鍵鋒，玩完一輪之後，繼續訪問。

江：Joe（馬德鐘）當年入無綫，係有高層留意到佢嘅廣告，仲讚佢有潛質，你又畀無綫睇中？

陳：唔係，我一啲潛質都無，去無綫面試兩次都唔成功，好記得當時攞住一頁紙對白，揸住一杯酒，扮失戀去酒吧飲悶酒，點知一頁紙嘅對白，講兩句就完咗，面試兩次都係咁，梗係肥佬啦，好彩之後有監製搵我主持旅遊特輯，我先有機會做電視。

江：咁你喺TVB最喜歡邊套劇？

陳：當然係《洪武三十二》啦，對手又勁，又可以同我兒時偶像江若琳合作，圓咗美夢。

江：哈哈哈！咁你真係一生無憾喇！

陳：仲有，《美人心計》嘅林心如，都係一個好好嘅對手，佢都係我兒時偶像。

江：你有九千幾個兒時偶像喎。

陳：講真，同心如真係好開心，佢喺戲內戲外都會好照顧對手，對完稿之後，會問你有乜需要，點樣可以令大家好啲，戲外，佢知大家趕戲有時要捱餓，佢會買大堆嘢食返嚟請大家食。

事業低潮 Vs 慘被出賣

江：除咗做演員，你都有唱歌，我都有聽過你嘅歌喉，真係唱得幾好聽，但我知你簽過三次唱片公司，99年仲錄過音，但最終因為唱片公司易主，所以最後出唔成，呢樣係咪你事業嘅一個低潮？

陳：對當時嚟講，係嘅，因為嗰陣時細個，當然係一個打擊，依家我只會當係一個成長經歷，好似近年有啲人喺背後講我壞話，例如，陳鍵鋒邊度得架，做戲又唔叻，又唔靚仔，紅唔到架喇，我會視呢啲說話係一種激勵，要做得更好令講我嗰啲人會另眼相看，呢啲負面嘅事，對我嚟講，反而係一種強心針，我會好正面咁去面對。

江：有無圈中人鼓勵過你？

陳：有，但唔想開名，真正嘅朋友在心中，唔需要刻意。

江：相反，有無試過畀圈中朋友出賣過？

陳：入行咁多年，一定有好人有壞人，有支持、亦有畀人出賣過，咁先豐富！畀人出賣之後，我學會要帶眼識人，愈信佢，就要愈反省，點解我會咁信佢，經過教訓，就會學識睇人。

患「病」見真情

江若琳與陳鍵鋒雖然早年曾合作拍劇，但成為好友全因拍攝《洪武三十二》。江若琳坦言拍攝該劇期間，適逢要拍另一部電影扮演精神分裂患者，當返回電視劇組時，她坦言很難投入，拍得很辛苦，陳鍵鋒在受訪期間，即笑着「寸寸貢」指江若琳本身已有精神分裂，所以拍電影分外得心應手，不過玩還玩，江若琳坦言對方在拍戲時，對自己其實照顧有加：「好彩佢同謝天華、馬德鐘知我好辛苦，所以特登撩我玩，有一日仲將拍戲畫嘅監犯相，加鬚加啲低能嘢引我笑，等我可以輕鬆啲，之後我哋仲將呢幅畫放咗上微博。」

採訪：影視組

攝影：劉智源

髮型：（江若琳）James Lee@HAIR

化妝：（江若琳）諺瞳小白@Picturesque Gate

服裝：（江若琳）Initial吊帶褲

服裝：（陳鍵鋒）SWANK