鍾浠文愛粗獷男篩走柏豪

余文樂與著名品牌合作推出時裝，前晚為新店舉行開幕酒會，獲好友周柏豪與緋聞女友鍾浠文前後腳撐場。鍾浠文透露前晚是初次與樂仔見面，不過平日亦有關注對方消息，問到伊人的擇偶條件？她坦言偏愛「粗獷污糟型」：「鍾意有啲鬚根粗獷型，唔鍾意太斯文，圈內會揀似小田切讓。」

遺失核突照

對於最近有圈中人多次意外流出私人照，鍾浠文坦言好擔心，表示現時在公開場合遇陌生男子要求合照時亦會小心，她說：「唔會咁近囉，之前唔見咗電話都好緊張，（有親密照？）有啲核突自拍照，其實拍拖有攬攬錫錫相都好正常，不過同之前男友嗰啲，大家分手後都刪除晒喇。」

周柏豪及鍾浠文不怕緋聞合照。

余文樂努力經營事業，未得閒搵女朋友。

品牌有假貨

忙於為唱片宣傳的樂仔剛剛由北京返港，雖然唱片巿道不佳，但樂仔仍堅持說：「做得好，一樣搵到錢。（咁忙點搵女朋友？）連瞓覺都冇時間，有錢先諗娶老婆啦！」至於其品牌在網上已有翻版，樂仔坦然面對說：「冇得嬲，相信價錢上消費者唔會搞錯。」

採訪：音樂組