發哥開腔撐霆鋒稱帝
大熱影帝謝霆鋒獲周潤發力撐為「影壇接班人」，老婆張栢芝今晚不僅盛裝與霆鋒同走紅地氈，還悉心計劃為老公搞加油派對打氣。賽果未揭盅，霆鋒人氣已先贏半個馬鼻﹗
栢芝搞制服派對
入行十多年的霆鋒今晚將憑《綫人》，挑戰前輩級人馬周潤發、梁家輝、張家輝及張學友爭金像獎影帝。據可靠消息指稱，最後一輪的五十位評審對發哥及霆鋒的演出最為看好，得票可謂叮噹馬頭，不過發哥昨接受訪問，竟揚言睇好霆鋒「稱帝」﹕「我睇好佢攞獎，新一代演員中佢進步好大，希望佢可以得到認同﹗」簡單的一言半語，已可見霆鋒在發哥心目中「地位超然」。
栢芝今日為撐老公，除了不惜將工作安排延後外，早前又舉家往泰國度假減壓，昨晚更發起制服派對，為老公攞獎打氣，而栢芝改妝後被派到九龍區「繞場一周」，如此費心勞碌只為博老公一笑，相信霆鋒早已甜在心頭。至於「大戰前夕」仍表現輕鬆的霆鋒，談到獲發哥「送高帽」，他透過助手回應謂：「多謝發哥囉，但一切以平常心面對，真係攞到獎先算啦。」
四哥打趣「邀功」
記者亦與謝賢（四哥）取得聯絡，對於囝囝被捧為大熱影帝，更獲發哥開口力讚，他哈哈大笑謂：「有大家嘅認同梗係開心啦，不過發仔可能係因為我嘅關係先讚佢啫，不過講真，我個仔拍戲好認真，所以抵讚，邊個新人好似佢咁吖？」四哥坦言今晚不會到金像獎現場，倘若時間許可則會安坐家中欣賞：「睇唔睇都冇所謂，最緊要知道賽果啫。（英皇已經book咗場慶功喎。）如果佢哋請我，我咪到囉。」
最佳男主角（入圍）
周潤發《孔子 決戰春秋》
張學友《月滿軒尼詩》
梁家輝《李小龍》
張家輝《綫人》
謝霆鋒《綫人》