王家衛震驚：好懷念佢

曾與鄧光榮合作《阿飛正傳》的王家衛：「喺我心目中，大哥一直係一個好健康、好開朗嘅人，當我聽到呢個消息嘅時候，真係好震驚同好難過。佢係我一個好好嘅朋友同老闆，係佢第一個鼓勵同支持我做導演嘅，佢亦都分享咗佢好多經驗畀我，所以我好懷念佢，希望佢嘅家人節哀。」

鄧光榮生前好友曾志偉表示對方身體一向好好：「佢成日做運動，幾個月前仲戒埋酒，過緊啲家庭生活，真係好愕然，（鄧光榮個心臟係咪有事？）尋晚先聽到，佢成日叫人唔好飲酒，唔知係咪個心唔好，要去睇醫生，（有傳佢死前一晚上賭船玩通宵喎？）係呀？唯一知道情況係去咗佢屋企嘅陳自強都講唔到啲乜，鄧光榮走嘅時候佢媽媽都在場，（鄧光榮有咩遺願？）太突然，無乜嘢遺願，（金像獎追頒獎項畀佢？）太突然未開會，總之若有需要演藝人協會會提供協助。」

曾與鄧光榮合作的張艾嘉讚對方對朋友很有義氣：「知道佢離世，好突然，我心情好沉重。同佢拍過戲，之後都好少聯絡，唔知佢有心臟病，見佢都好健康同開心。（你哋係咪拍過拖？）呢啲係你哋亂講咋，你哋咁都信？」

鄧光榮生前好友林建明已託朋友問候佢太太同女：「好難過好可惜，我哋十幾歲相識，印象中佢好靚仔、眼神好迷人、有風度又錫屋企人。近日都有親人同朋友離開，佢哋病咗好耐、好辛苦，大哥睡夢中過身，冇痛苦離開都算係幸福，只係匆忙咗，屋企人同朋友需要時間去接受。」