梁思浩懵盛盛爆陳煒私隱
演藝人協會踴躍發起賑災，各方支援之際，有人竟以假微博搗亂，成功令梁思浩信以為真，更將廿多名藝人電話號碼交給對方，據知其中一人是前亞姐陳煒。梁思浩如今後悔不已，擔心老友受騷擾。
香港演藝人協會一向為善最樂，明天會為日本311九級地震舉行「愛心無國界311燭光晚會」，早前大會宣布賑災後即一呼百應，而網上亦出現一個以香港演藝人協會官方標誌為照片的虛假微博，令到梁思浩墮入被騙陷阱。
聯絡廿多藝人
梁思浩昨日出席亞洲電視公布資訊節目收視，他表示要向陳芷菁、曾志偉及林家棟等演藝人協會幹事道歉，直言被假微博所騙。他說：「我一心諗住做義工，幫手聯絡咗廿幾個藝人，畀晒大家嘅電話佢，點知陳芷菁通知我個微博係假，演藝人到依家為止係冇微博！我真係唔明，點解有人喺呢個時候，大家都做緊善事嘅時候做呢啲嘢？」
陳煒未被騷擾
梁思浩坦言花了半天時間通知所有朋友要小心，自己亦深感內疚，自責太容易相信人，擔心會為大家帶來麻煩，他謂：「依家要呼籲大家唔好相信假微博，有咩事要同陳芷菁求證。」據知陳煒是其中一名受害人，她透露沒有收過騷擾電話，但假微博曾有發訊息叫她出席活動。
文：影視組