Kelly搵銀食海風 薑茶暖孖B
懷有孖胎的陳慧琳（Kelly）早前以幸福女人look拍廣告，當時懷孕2個月的她，不但棄穿至愛的高踭鞋赤腳行沙灘，還自備暖爐和薑茶驅寒，高度戒備保護孖B。
人工受孕懷孖胎的Kelly幸福滿瀉，早前為代言的金至尊拍廣告，主題「幸福女人」就是為她度身訂造，內容以她的生活為藍本，廣告分兩天拍攝，當時Kelly已懷孕兩個月，貪靚的她為孖胎着想，棄穿至愛的高踭鞋，不但改着安全平底鞋，行沙灘時更赤腳上陣，高度戒備，母愛至大的她說：「呢次個肚比上次大一倍，所以要小心多一倍，冇嘢比肚裏BB更重要！」
蝦餃仔未去過沙灘
其中一幕講Kelly「一家三口」行沙灘，不過當日氣溫降至10度，吹住海風的Kelly為免凍親自己和孖胎，自備了暖爐和薑茶驅寒：「依家有咗BB，健康唔再係我一個人嘅事，當然要好好保暖，唔能夠畀自己同肚內嘅BB着涼。」
拖住廣告中的囝囝在沙灘耍樂，Kelly母愛大發說︰「睇住佢玩到紮紮跳，諗起原來『蝦餃仔』未去過沙灘，希望孖B出世之後，同老公Alex帶『蝦餃仔』和BB去沙灘玩。」
「打排卵針唔太痛」
問到會否趁機教BB游水？Kelly笑說︰「要教『蝦餃仔』先，不過呢啲高難度動作，都係留畀Alex教，我同佢哋玩堆沙。」
今次廣告製作班底強勁，請了金像美指奚仲文設計形象，而拍攝所用的婚紗由何國鉦設計，以逾200卡、過千粒鑽石造成，價值高達1,288萬。
此外，有指Kelly接受人工受孕打了逾30支排卵針才成功，Kelly透過助手回應：「係要打針，幾多支唔講嘞，OK唔係太痛，可以接受。」
文：音樂組