健仔離家出走：好似中叻降
人生如戲，每齣戲都有綠葉，彭健新和葉智強就是溫拿的綠葉，做了38年主角的譚詠麟，到今天才深入探討綠葉「燈謎強」的內心世界，還自爆曾被彭健新老竇扯火撕爛衫的絕世秘密。
倫：譚詠麟
健：彭健新
強：葉智強
兩叔姪 變同學
倫：以我角度覺得讀者想知，阿強一定係一個謎，流動燈謎，哈哈！今日要破謎，阿強，我都想知你有幾多兄弟姐妹？
強：我都好謎，哈哈！屋企有十個，計埋去咗兩個。
倫：阿強喺溫拿我第一個識，佢彈歌畀我聽，但低8度唱唔到，由此可見阿強個人好鬼死蒙，出面嘅人覺佢一個謎，我覺得阿強係一個蒙，謎蒙，哈哈，今日想探討吓你嘅內心世界，你細個讀過幾多間學校？
強：數數埋埋4、5間，本來好正經，讀聖瑪利亞堂考第4，（沒好氣地）老竇無端端叫我跟健仔去澳門讀書，跟住考第尾。
倫：上樑不正下樑歪，佢兩個兩叔姪，阿強年紀輕輩分高，健仔年紀大過佢，但要叫佢表叔。健仔喺溫拿中讀書「最多」，佢同阿強做同學，由高年級同學變低年班同學，佢話鍾意本書，強迫將自己留喺5年級。
健（死撐）：慳幾多錢呀！幾好吖。
倫：嗰時你兩個關係好唔好？
健：非常好，佢教我彈結他，所以彈錯晒，哈哈！我爸爸同佢爸爸同行如敵國，都係做洋服，仲要拍住喺隔籬，佢嗰邊一多人，老竇就派我過去睇吓。
自恃音樂天才
倫（自爆）：健仔老竇好好笑，彭叔，佢係唯一一個長者同我發生摩擦，因為健仔聽阿叻（陳百祥）唆擺離家出走。
健：阿叻話我咁有音樂天才，日日留喺屋企畀老竇鬧，梗係要起一次革命，喺我耳仔講咗半年，我迷迷糊糊好似中咗降咁。
倫（插嘴）：中咗口力降，「叻」降，哈哈。
健：當時16、17歲，覺得自己好似好有天才，攞個篋出嚟擺幾件衫落去，跟住離家出走，去咗同學屋企住。
倫：依家佢朋友好出名，黎有田，係桃花源主廚，攞埋米芝蓮。
健：佢老竇問點解我夜晚3點至返，因為我喺酒吧做唔話得畀佢知。
倫（口衰衰）：話佢做倒屎囉。
健（即鬧）：黐線！阿田好嘢，話我高尚職業，係文化界喺報館做，幾好橋呀，（不屑）你話倒屎！
倫：彭叔當時受刺激，我又唔知喎，我去搵阿叻，要經過佢舖頭，佢老竇衝出嚟，㩒住我心口推我出去，行動中大家糾纏，佢撕爛咗我件燕子領飲衫。
健：1967年幾千蚊可以買一層樓，我每兩星期攞100蚊返去，如是者阿媽話老竇原諒我；阿叻見到我返屋企，第一句就話：「係咪呀，如果你唔係離家出走，你老竇唔會接受你玩音樂，你老竇依家引以為榮，你早啲聽我講離家出走，成就更大。」
燈謎強 包拗頸
笑完一輪，阿倫將矛頭再指向「燈謎強」。
倫：阿強，身為朋友，我哋唔係好知你內心世界，你睇每一樣嘢，我哋覺得你全部放悶氣。
健：阿倫講過一句至理名言好啱阿強：「別人贊成我反對，別人反對我贊成。」佢就係咁嘅人，包拗頸。
強（自辯）：唔係，嗰時開會慣咗一定要拗頸，搵啲嘢挑剔吓人。
倫：可能喺溫拿入面，我哋講嘢密密嘴，係阿B慢少少，阿強攝唔到位，你性格真係好直，我身受其害，你好憎一隻歌《House of rising sun》，我去親party啲人成日點唱，阿強可能彈得多，將四條線放鬆晒，好似一條排翅咁，好在我係全天候歌手。以你咁性格，移民第二度會唔會吃虧？
強：都唔會，隔籬屋好好，教我剪草、淋花，有時行開仲幫我睇屋。
倫：咁多年入面，好多時我同阿B喺前面，你又成日唔出聲，你心入面有冇唔舒服呢？
強：真係冇，由細玩到依家都係咁，我好易唔記得衰嘢，只係記得開心。
倫：阿強性格冇乜所謂，個人好樂天，呢個係好元素，做人最緊要樂天知命。
夫妻之道 要退一步
傾了半粒鐘，阿倫問記者：「阿強夠唔夠料呀？健仔嗰啲大家多數知。」健仔插嘴：「未必，你問我呀，刁鑽啲。」
倫（嚟料）：健仔你最早結婚，會唔會早得滯，好多嘢未享受過？（對記者說）佢老婆我介紹識，媒人嚟，佢好鍾意女仔大手臂。
健：我鍾意高大型有肉地，但老婆嬌小玲瓏，我識佢半年阿媽話訂婚，我係一個任人擺布嘅人，依家就唔係，有主意唔同咗。
倫：依家唆擺唔到佢，睇佢髮型就知，幾硬頸，千載不變，哈哈。
健（得戚）：幾十歲仲有咁嘅髮型恨都恨唔到啦，係咪先。
倫：你哋夫妻相處之道係點呢？
健：好簡單，退一步就得，如果我早撐就早啲收場。（全場大笑）
倫：健仔以前唔食煙唔飲酒，但依家開始飲酒，因為識咗啲朋友，啲紅酒好靚。
健：係阿倫囉，我以前飲親都頭暈，阿倫話5萬蚊支，梗要試試，跟住愈飲愈大，10萬一樽，我開始識飲紅酒，仲做咗紅酒代言人，多得阿倫成日畀靚酒我飲，自此以後譚生將我嘅地位擺咗上流社會，飲咁嘅酒仲唔係上流社會，依家有主意，唔靚唔飲。
心中富有 知足常樂
記者提議健仔和阿強問番阿倫，阿倫抵死說：「你哋問我，真係唔知你哋想問乜，空白嘅。」
倫：呢兩個人個腦喺溫拿最值錢，因為少用，新鮮吖。
健：其實溫拿中人，每講一樣嘢如果嬲就做唔成朋友，一笑了之，朋友話我忍耐力非常好，譚生咁挖苦你、踩你，我覺得開心，同埋友誼象徵，你試吓第二個黑晒臉，一世唔睬你。
倫：證明你EQ高，你最鍾意歡樂，最富有係你，心中富有。
健：譚生講得啱，阿強企後面冇感覺，我同阿倫、阿B企前面梗有感覺，啲人一定比較，阿倫拍咁多戲紅咁多歌，阿B搞咁多嘢買咁多樓（偷笑），我話大家生活唔同，佢可能三點未瞓仲拍緊戲，但我3點出去釣魚，對比梗係多勞多得。
倫：知足常樂，咁辛苦到將來所追求咪又係片刻開心，有時好多人攞呢啲說話嚟講，觸到你神經唔開心就好蠢，唔緊要呀，我哋搵咁多都係請你哋食嘢啫，哈哈。（以笑收場）
採訪：肥B
攝影：吳文聰
髮型：Perny Tang of Silkcut Salon
化妝：Alice Lau
場地：PACIFIC CLUB