王祖藍克服高難度冧掂李亞男

王祖藍之前曾與蔡少芬、李亞男（Leanne）傳緋聞，但外間都只當笑料，不過經過力追三年後，竟與李亞男拍拖一年多。昨日祖藍以半個女裝返電視廣播城，對於之前指女友是圈外人，他說：「唔係咁講點會年幾先畀人知，之前傳緋聞時我係對佢有意思，但冇正式開始。」問他何以夠膽追「高妹」？祖藍謂：「佢好好，我鍾意佢唔介意我矮。」

承認半個大話

祖藍表示公司早知二人拍拖，但囑他們待穩定才公開，至於家長則在未正式拍拖時已見過，他說：「我見過佢屋企人，希望之後去溫哥華登台時有機會再拜會佢家人，而佢都見過我細妹同阿媽。（阿媽鍾意佢嗎？）OK呀！阿媽覺得佢好純品。」問李亞男是否其結婚對象？他說：「我哋都好認真，依家公開咗，反而輕鬆，之前都好辛苦吓。」

前晚無綫節目巡禮中，任司儀的祖藍與李亞男（紅圈示）在化妝間孖住化妝。

祖藍自知保不住地下情，在微博自行踢爆。

對於他一直指女友乃圈外人是講大話，他說：「一半一半啦！有一半係事實，好似蔡少芬話齋，點都話冇啦！咁做係要顧及二人空間之餘，亦可派定心丸畀佢同佢家人。」記者指虔誠基督徒很多「事情」做不得時，祖藍笑謂：「好多嘢都做得，喺神面前好自由。（婚前性行為呢？）你哋諗多咗嘞！（你定力夠唔夠？）你哋諗多咗嘞！」

之後二人一起接受訪問，Leanne居然主動搭祖藍膊頭影相，比祖藍高半個頭的她說：「Sorry呀！我已經着咗平底鞋。」她又續說：「公開咗開心晒，初頭有壓力，依家可以周街玩、食飯。」之前祖藍曾指女友不喜歡他扮女人，Leanne說：「係呀，嗰陣有少少，因為佢身材好過我，有啲妒忌。（鍾意佢啲乜？）有責任感、個人好sweet，畀好多驚喜我，好愛我！」

避談結婚對象

Leanne又透露祖藍向她表白當日帶她「賣豬仔」，與她去看星星，記者問是否「劏豬」時，祖藍指與豬無關，更叫中文不好的Leanne小心說話。問祖藍是否其結婚對象，她即以男友名言說：「你諗多咗嘞！」之後二人更開心擊掌。說到會否以「情侶檔」工作，祖藍坦言不想，不想再將僅有的拍拖時間用來工作。

李亞男（26歲）

身高：5呎9吋

背景：04年溫哥華華裔小姐冠軍、05年國際華裔小姐冠軍，曾參演劇集《談情說案》和《巾幗梟雄之義海豪情》等。只曾與歌手王浩信及王祖藍傳緋聞。

王祖藍（30歲）

身高：5呎4吋

背景：曾奪08年ＴＶＢ飛躍進步男藝員獎，以搞笑形象上位，曾參演《同事三分親》、《畢打自己人》等，與阮兆祥、李思捷主持《荃加福祿壽》人氣急升，曾與蔡少芬傳緋聞。

文：影視組