王菲匿埋玩微博全場呆等

星級化妝師Zing昨晚舉行慈善攝影展，頌揚二十位香港最漂亮的女人，包括王菲、劉嘉玲、舒淇、葉蒨文、李美鳳、琦琦、Angelababy等紅星，現場星光熠熠，衣香鬢影。本報日前率先披露王菲將於明年三月假亞洲國際博覽館開騷，而剛完成北京騷的她特意來港撐好友，現身時引起全場哄動。

與友人談星座

王菲一身黑look現身，以one piece裙襯皮boots，有型有格。未知是否因個唱成功完騷兼售出蝕本貨寶松苑，王菲昨晚被記者拍照時展露笑容，還跟主人家Zing合照。不過，三分鐘後王菲即玩快閃，匿埋後台唔見人，與傳媒捉迷藏，原來王菲匿埋玩微博，與友人大談星座。

影大合照時，王菲要「三催四請」才尷尬出現，識做的她站在最右位置，明顯不想搶風頭。

上車離開時，王菲依然拿着手機玩微博。

之後司儀鄭丹瑞（阿旦）叫眾星到台前合照，劉嘉玲、葉蒨文、琦琦、舒淇等紛紛就位，但獨欠天后王菲，阿旦開咪叫了幾聲王菲，但遲遲不見人影，連阿旦都面露尷尬之色，惟有叫其他嘉賓先影合照，大家邊影邊等。

嘉玲與Zing在台上密密斟。	王菲出場時有保安「護駕」，非常架勢。	嘉玲否認不理受傷的偉仔，在適當的時候會出現。

足足過了一分鐘，王菲才姍姍出現，露出尷尬笑容地企大側邊，身旁的男子示意她移步企中間，王菲卻不好意思，終於開金口說：「唔使，唔使。」影完合照即在大批保安護駕下，箭步從特別通道離開，沒有接受訪問。她由女友人陪伴坐七人車去金鐘某酒店。

而王菲好友劉嘉玲穿絨外套襯黑色吊帶衫，佩戴七位數卡地亞高級珠寶系列項鏈，高貴迷人。對於被指為最靚女人，嘉玲笑說：「太抬舉，多謝Zing，每個地方都有靚女。（覺得邊個最靚？）唔可以講自己，我鍾意紅姑，好靚好舒服。」對於現在興「人工美女」，她說：「靚啲就無妨，依家科技安全。（你有冇需要？）暫時唔使。」

嘉玲有理丈夫

此外，有報道指嘉玲不理拍戲受傷的丈夫梁朝偉，令他好孤單。她沒好氣反問：「覺得我會唔會唔理佢？（有冇check佢？）由認識開始都唔check，我哋每日通電，係家人式問候關心。（佢有冇嗲你？）都會，不過都好多人關心佢，包括助手、骨科醫生，我喺度覺得我阻碇，要適當時候出現。」對於王菲開騷齋唱唔講嘢，嘉玲力撐：「唔需要講嘢，睇王菲係聽聲。」另外，再提到嘉玲在電影《最強囍事》片酬少過張栢芝，她說：「自己從來唔係第一女主角。（介意片酬少？）唔介意，再介意就白活了。」

文：音樂組