徐正曦揀女江若琳啱feel

來自內地的徐正曦與江若琳同屬寰宇旗下，早前兩人一起到泰國拍戲，同片還有台灣可愛教主楊丞琳，與「雙琳」合作，問徐正曦感覺如何？他表示：「佢哋有一個共同性格，就係一樣咁勤力。我同江若琳未合作之前已經係朋友嚟，識咗兩年，我一向都覺得佢好勤力同好有天分，尤其講普通話，比一般香港人講得更加之好，至於楊丞琳，佢唔係我哋公司，所以唔係好熟，我覺得佢好可愛同幾性感。」

被指似黃曉明

與「雙琳」在泰國相處了一段時間，徐正曦應對兩人有一定了解，問他若要在兩人之間，選一個做女朋友，會揀哪一個？徐正曦斬釘截鐵地表示：「我會揀江若琳，因為佢嘅女人味重啲、開朗啲，同埋同佢幾啱傾，由電視劇《男兒本色》開始，已經係朋友，感情深啲。」

徐正曦入行已一段日子，因外形俊朗有點像黃曉明，內地傳媒曾以「翻版黃曉明」來形容徐正曦，問徐正曦覺得自己像不像黃曉明？他表示：「我反而聽過有人話我似金城武，但我就覺得兩個都唔似，我似徐正曦，哈哈。」

文：影視組