關楚耀冧女糕手誠意搭夠
關楚耀原來對烹飪甚有興趣，日前與歌迷齊齊舉行整餅大會，親自為歌迷做蛋糕，雖然過程顯得雞手鴨腳，不過勝在誠意搭夠，他直言希望進修廚藝：「就算第時女朋友唔識煮唔緊要，我煮畀佢食。」
閉關年多的關楚耀最近再度活躍樂壇，外界對新碟《HERE I AM》反應不俗，令他非常感動：「我知道好多人支持自己，尤其係歌迷，所以好想同佢哋見吓面。」
日前，他邀請歌迷齊齊整餅，雖然有專業導師從旁指導，但他仍相當論盡，不時問身旁四位歌迷的意見，其他歌迷忍不住哈哈大笑。關楚耀為蛋糕掃上最頂層的忌廉時，顯得不知所措，最後導師忍不住捉着他的手教授，但他卻冇厘正經謂：「依家好似嗰齣《人鬼情未了》咁。」
四十五分鐘完工
四位歌迷負責裝飾蛋糕，男歌迷用忌廉在蛋糕寫上關楚耀的英文名Kelvin的「K」字，花近四十五分鐘終於大功告成。
問關楚耀有否嘗過女朋友做的蛋糕？他謂：「冇喎，反而我阿妹就有整過，佢係煮嘢食高手，我得閒都會問吓佢。（要求女朋友識煮飯？）有就Bonus啦，不過唔識都唔緊要，我煮番畀佢食！」
攝：劉智源 場地：Cake 1 Cake
文：盧坤穎