Tommy耍冧功電暈Lavina
日前「E級o靚模」Lavina（鍾蕙芝）跟前E-Kids成員Tommy（阮民安）被拍得結伴到澳門「開房」，想不到事隔不夠一周，兩人竟又按捺不住，雙雙到海旁談心。
前晚約七時，Lavina跟Tommy到九龍海逸君綽地下的Cafe撐枱腳，期間二人表現親暱，Tommy更細心為Lavina篤檸檬，又點了一件蛋糕兩份食，Lavina先餵Tommy再餵自己，毫不介意食Tommy口水尾。兩人不時咬耳仔，細聲講大聲笑，傾得興起時，Lavina更脫下外套，露出豐滿的「E級」身材。約半小時後，Tommy拿出大鈔埋單，盡顯紳士風度。
掩護女方上車
隨後，二人似意猶未盡，步行到附近的海旁繼續「談心」，未知是否因海旁四野無人，他們的舉動愈來愈大膽，除不時情深對望，Tommy更細心地把Lavina被吹起的秀髮捲在耳背，女方顯得非常受落，不時報以微笑，一臉冧爆。
風勢愈來愈大，Tommy為免女方着涼便示意離開，此時記者上前追問二人關係，兩小口一臉錯愕，Tommy更邊用手擋鏡頭，邊掩護伊人上其保母車離開，而自己則步行往的士站，不理記者提問。原來二人之後結伴往紅館睇騷，事後致電問Tommy回應，他即大耍太極，指自己跟Lavina只是普通朋友，又說：「個演唱會真係好好睇！」便馬上掛斷電話。Lavina則表示：「我依家忙緊，有咩問題就問Tommy啦！」
文：專案組