祖藍飛天遁地 嘉賓有籮記

汪明荃（阿姐）、阮兆祥、王祖藍及李思捷昨日為《荃加福祿壽宇宙最長演唱會》開記者會，同場的還有英皇高層吳雨、無綫高層樂易玲等，為配合演唱會主題，出場時「福祿壽」穿着「星球大戰」裝示人，更即席唱演唱會主題曲及首播MV，期間，又拉出一條印滿紅星的banner指是最長的嘉賓名單，不過當中包括羅文、梅艷芳等，未知「福祿壽」到時是否扮演他們。

肯定唔會加場

阿姐對於演唱會中星球大戰造型相當滿意，更要求宣傳海報前影相，問她演唱會中會否有更多造型，她說：「都係度緊，我主要唱歌，唔係扮嘢，啲衫有設計師搞，今次演唱會同平時節目唔同，又唔同自己演唱會，到時都會一齊玩吓，迎合佢哋。（係咪請咗好多嘉賓？）都應該有。」問到MV中為何沒有她，阿姐坦言：「佢哋三個做靈活啲，可能佢哋之後都會一齊接show、登台，有時好難就晒四個人。（之後巡迴演出你會否去？）都要睇時間。」

阿姐表示今次出騷，服裝有設計師負責。

眾人齊齊舉杯預祝演唱會成功。

至於「福祿壽」則齊聲表示肯定不加場，阮兆祥謂：「我哋有最長嘅嘉賓名單，實際已有四個應承咗，我哋成功扮過嘅都會出現。」而祖藍表示舞台效果跟平時廠景不同，飛天遁地都有，若反應好希望可以開part2。問他之前曾於伊館開show是否有經驗，他說：「冇得比，上次賣唔爆飛，今次一定爆，思捷都佔咗一半，仲有明荃之友，所以一定爆。」

錢國偉拒回巢

今次擔任監製的錢國偉昨日於現場打點一切，他今次以freelance形式與無綫合作，坦言都有傾之後邵氏電影的合作事宜，問無綫有否叫他回巢，他說：「冇，我暫時都冇咁諗，出去闖吓先，（係咪出去搵多啲？）我又要走來走去，多少少啦！（出年又可能多咗免費電視台，有冇人搵你？）有人招手，傾過吓，（何禮全跟你走？）係都我跟佢走啦！係傾緊，但未有定案。」

文：影視組