張文慈建議收錢開工
韓君婷接內地工作時遇人不淑，欲推掉工作時遭到恐嚇，香港藝人在大陸工作實在危機四伏。最近到陽江登台時遇上狂徒亮刀的張文慈接受電話訪問時表示：「幾年前去深圳幫一間會所拍廣告雜誌，去到原來係桑拿室，見貨不對辦想走，但係又唔畀我走，焗住要拍埋先，最慘係張支票彈票收唔到錢。原本簽約時話個廣告只係播一次，依家仲畀人不停咁播，但係都冇佢符。」
問到接大陸工作有何防範？張文慈說：「因為我冇經理人，自己會盡量揀一啲相熟嘅工作去做，如果唔熟悉，自己會安排司機，有咩事都可以第一時間走人。同埋依家去到會收晒現金先開工，雖然攞住咁多錢過關都麻煩，但係都冇辦法。」
模特兒莊思敏之前亦試過以自由身接工作，出現被拖數及無錢收等情況。她說：「我試過行完騷之後，間製作公司執咗笠，一蚊都收唔到，好在只係萬幾二萬蚊。」對於韓君婷被恐嚇，莊思敏認為應該報警備案，避走外地並非上策。