夏韶聲發信寸施明烏龍
施明昨日出席《施明傳心愛您慈善演唱會2010》記者會，宣傳月尾為印度僧侶籌款的慈善演唱會，但夏韶聲卻發律師信，指被人在宣傳海報中盜用肖像，而他根本沒有答允演出。原來施明竟然將已洽談演出的大AL（張武孝）誤當成夏韶聲，並把他的照片印在宣傳海報上，擺出大烏龍，夏韶聲更叫施明以後唔好認錯人。
施明被問是否已收律師信，她說：「我了解緊件事，係我大懵，成日撈亂人樣（把大AL誤作夏韶聲），想向受影響人士道歉，想同夏韶聲及大AL解釋番，但我冇夏韶聲電話，會搵人轉達，我忙演唱會好多嘢要顧，已經抽起啲海報，但慈善性質，唔會再印過，（安排退票？）聽日（即今日）至正式售票，已賣出嘅飛多數係朋友幫手。」
聯絡兩日冇回覆
夏韶聲對於被錯認成大AL，並把他之照片印在海報上，他說：「咁都得？其實係有fans買咗飛，留言話我知，我先知件事，我搵助手聯絡嗰邊，但兩日都冇覆，惟有搵律師。我唔係要賠償，只要求佢哋收番啲海報、出聲明同喺演出當日講番件事，唔好等人以為我甩底。我都識施明，我諗有人大懵搞錯，我戥大AL唔抵，佢至係有份唱嗰個。有人同我律師講不如我索性唱埋，但程序唔係咁，況且我要去內地同返美國，做唔到。但施明唔使擔心，呢件小事啫，不過以後唔好再認錯人啦！」
文：影視組