余文樂插花剷籃百女尖叫
曾是港青籃球員的余文樂及周柏豪前晚出席籃球比賽，狀態大勇的兩人成為對方攔截目標，樂仔剷籃時遇三人夾擊推倒地上，難怪他發出慘叫聲，期間他又表演「插花」，引來過百女歌迷尖叫。
樂仔與柏豪當年是香港青年軍籃球選手，年多前兩人與十多位籃球好友組成「橫洲工業」球隊，並報名參加各區比賽及盃賽，前晚球隊出席康文盃十六強比賽，吸引數百歌迷聞風而至逼爆觀眾席，開波前十五分鐘，柏豪與樂仔分別穿上八號及六號球衣熱身及練波。
被推倒發出慘叫
兩位型男在球場上發揮超水準，彈跳力驚人的柏豪多次成功搶籃板，並將波交給好兄弟樂仔射三分波，「打孖上」陣容為球隊取得廿多分，樂仔還大騷Quali玩「插花」，由於兩人入球率超高，令對方要臨時變陣，每當兩人持球時即被三人「盯實」，期間樂仔見有空位即剷籃，但遭對方出手推跌，樂仔忍不住大叫一聲，最後成功射入兩球罰球。
「篤魚蛋」傷手指
球隊最後以50：26大比數勝出，身水身汗的樂仔與柏豪第一時間衝入更衣室沖涼，吸引數十女歌迷在門口等待，由於樂仔不停用右手按住左手，他承認因「篤魚蛋」整傷手指，而柏豪坦言滿意自己表現，並開心報喜說：「入到八強啦！」之後，樂仔出動他的靚車接載周柏豪等，拉隊到尖沙咀打邊爐醫肚，食足兩個多小時才分頭離去。
文：音樂組