傳周家蔚洪天明吵大鑊分手
洪天明、周家蔚拍拖一段日子，近日有指二人「吵大鑊」分手，向兩人求證時，身在大陸拍劇的天明表示冇回應，不過家蔚言語間卻指有人煽風點火，坦言男未婚女未嫁，感情的事很難說。
天明與家蔚拍拖多時已是公認的一對，家蔚更被人稱呼為「天明嫂」，早前雙雙出席婚紗活動，一如婚禮預演，而家蔚日前於微博放上戴上友人的巨型鑽戒，恨嫁的心表露無遺。
「邊個清楚得過我哋」
惟本報收到消息，指二人日前嗌大交分手收場，記者昨日致電天明，他反問何處聽來後即說：「我哋兩個嘅嘢邊個會清楚得過我哋，我依家喺大陸拍劇，總之冇回應啦！」說罷便匆匆收線。
記者再致電家蔚問及是否跟天明分手？她說：「係咩？邊個講呀？（係咪嗌大交嚟？）冇乜特別，個個都會嗌交架啦！（咁係咪分手呀？）邊個講，唔知邊個煽風點火，或者有人鍾意佢咪專登咁講，如果係女仔講嘅就想同佢一齊，如果係男仔嘅就想同我一齊囉！不過我好專一，呢啲分得好清楚。」
家蔚言語間有骨，是否意指有人想拆散他們？她說：「有乜話點，男未婚、女未嫁，都有可能，唔好話拆散，感情呢啲嘢好難講。我哋每日都有通電話，仲係男女朋友關係。（即係冇事？）佢依家喺上海拍劇，除非佢有另一個啦！（咁你哋嘅感情係咪好穩定？）OK架！不過男未婚、女未嫁，一日未結婚一日都唔知，我爹哋、媽咪婚姻都唔係咁好，自己呢方面會有唔同睇法。（佢未過媽咪信主嗰關？）未，佢有返教會，但仲未真係信，加上佢都好忙。（會唔會畀好大壓力天明？）男仔有壓力係啱嘅，當一頭家就要有壓力。（愛你就要承擔呢啲？）係！」
同老婆仔咀嘴
此外，家蔚早前與友人到馬爾代夫旅行，未知是否藉此散心，首次學潛水的她大表過癮，她又與好友水中「咀嘴」，她說：「我同佢好熟，會叫佢做老婆仔，一一時貪玩先咁啫。」
文：影視組