鄭嘉穎另搵對象組家庭
鄭嘉穎與緋聞模特兒女友徐靖雯（Jenny）關係降呢，嘉穎昨將Jenny由「好朋友」改稱為「朋友」，露口風物色對象成家立室的他，並沒有視Jenny為對象。而她與嘉穎關係下降，生活也即時降呢，只食平價燒味飯、買街邊朱義盛耳環！
嘉穎昨日與樂基兒（Gaile）、文詠珊（Janice Man）及歌手應昌佑同出席環球貿易廣場72樓舉行的「天際100」親善大使畢業騷活動。
幾年內結婚生仔
早前嘉穎跟郭晉安舉家到澳門欣賞網球賽，感受安仔一家人的溫馨生活，令他期待成家：「但先要搵到合適對象。（你咪有model『女友』Jenny？）大家只可以係朋友。（欠缺乜嘢？）人夾人啦！（咁幾時組織家庭？）需要啲時間。（之前嗰啲女友唔夾咩？）夾就結咗婚啦，我都希望可以喺幾年內發生，因為結婚就會生小朋友，都唔想太遲，要睇天意。」嘉穎又說很難積極行動：「因為未拍拖，被影到相就話有嘢，咁冇可能一嚟就拍拖囉！」他又謂一直有留意周圍的女伴。
被嘉穎形容為「朋友」的Jenny，火速降呢，早前她身穿小背心配牛仔褲，素顏與經理人到銅鑼灣蛇王二開餐，時近三時，她在店內叫了一碗卅蚊的燒味飯，津津有味的吃了半個小時，飯後步往附近的名店齋睇冇幫襯，後在經理人提議下到專賣平價貨的渣甸坊，Jenny表現雀躍，樂此不疲的揀「朱義盛」首飾，最後以廿多元購買了一對銀色耳環。
JM撐Janice拍拖
而與嘉穎同場的樂基兒及JM談及同公司的衞蘭（Janice）與教會弟兄拍拖一事，JM力撐拍拖乃平常事，承認Janice近來心情大佳。又說公司沒有阻止藝人拍拖，作為圈中人，感情事還是低調處理較佳。Gaile則說Janice沒有向她提及拍拖，對方承認戀情再說。
文：名人組