張致恒玩命淚流險死異鄉
張致恒（Steven）早前聯同一班基督徒歌手遠赴馬來西亞傳福音，順道四圍遊覽兼享受陽光海灘，眾人更興高采烈玩激流，但Steven險些一去不返，他猶有餘悸憶述：「我當時心諗，唔係咁早返天堂呀？」
Steven、裕美、梁雨恩、徐偉賢、彭紀諺、Vega成員Gabrielle及赤子成員阿博等，早前結伴前往馬來西亞傳福音，逗留兩星期，雖然去年已到過當地，但Steven揚言今年特別開心及難忘，他說：「上年去嘅時候冇咁多年輕人信主，但今年已經多咗好多，我哋仲各自用音樂同佢哋分享作見證！」Steven表示此行聽到很多不同的見證，並大讚這班青少年勇於面對自己前路，令他大為感動，他說：「真係好感動，搞到我好想喊添！」
水流太急
完成「正經事」後，Steven與一班歌手抽空到處遊玩，更到某島嶼上享受陽光海灘及水上活動，追求刺激的他們更膽粗粗玩激流，但Steven卻險些客死異鄉，他說：「當日因為落過雨，水流漲咗又急，我同裕美隻艇畀水沖反咗，我就成個人沖咗落水底，當時右邊膊頭撞到水底啲石，痛到我以為甩骹，點知上咗船之後又反多次，又再次被扯番落水底，雖然着咗救生衣但都冇用，我完全抖唔到氣，差啲浸死！」
嘴角流血
問Steven當時可有祈禱？他說：「我內心喺度諗，唔係咁早返天堂呀？好彩最後都執番條命，但上咗船先發覺嘴角流緊血，裕美就嚇到係咁喊！」由於Steven趕回市區已入夜，故翌日才返港就醫，幸並無大礙，但經歷今次起死回生，Steven揚言不會再玩激流。
文：音樂組