A.Lin怕養唔大乳名阿屎

A. Lin的父母皆為福建人，談及兒時難忘事，她最記得是跟公公返學，她說：「我公公喺鄉下做老師，試過用車仔載我返學校上堂，佢可以一邊教書，一邊照顧我。」

賴尿阿嫲打

問她是否和公公的感情最深厚？A. Lin卻說：「其實我同嫲嫲、爺爺親啲，因為我出生後，媽媽唔得閒照顧我，所以帶我返鄉下畀爺爺嫲嫲湊，我曾經以為嫲嫲先係我阿媽。」而A. Lin更是嫲嫲的心肝寶貝，嫲嫲為怕乖孫「養唔大」，所以改她的乳名為「阿屎」。雖然被嫲嫲錫到燶，但曾遭嫲嫲體罰，A. Lin說：「我細個都幾曳，有次嫲嫲孭住我時賴尿，搞到佢成身濕晒，阿嫲激到打咗我幾下。」

A. Lin在鄉間住到約三歲，就由媽媽接返港入讀幼稚園，她記得和嫲嫲分開時喊到呼天搶地，嫲嫲看見當然傷心又不捨得，A. Lin說：「聽媽咪講番畀我聽，當時我隔住玻璃望實嫲嫲係咁失控狂喊。」返港後，她因為太思念嫲嫲，每日以淚洗面，曾試過要同校的哥哥到其班房陪伴她。

送上第一份糧

問她可有經常回鄉見嫲嫲？A. Lin說每年放暑假都會回鄉一個月陪嫲嫲，回港返學的日子，就會寫信給嫲嫲，她說：「我細個識字唔多，所以畫咗幅有我、有哥哥同嫲嫲，仲有個心嘅畫，我知阿嫲有keep住。」投身社會後，因為工作太忙，所以她改用電話和web cam和嫲嫲傾心事，又自爆為表孝心，將自己第一份薪金送給嫲嫲，她說：「都有五千蚊，阿嫲好開心，成日同人哋講佢個孫女好乖。」

文：音樂組