無綫偷雞加旁述隨時冇波睇
世界盃四強誕生，周三凌晨荷蘭對烏拉圭賽事無綫數碼頻道終於有得播，無綫鋌而走險，在有線提供的聲、畫訊號中，再加插多一條無綫球評旁述聲帶，形同麗音多聲道廣播，有線得聞無綫可能「偷雞」，聲言隨時會截斷訊號，無可能放生對方。此外，無綫明晚在奧海城舉行嘉年華出動十五位港姐和林峯等與觀眾一同打氣。
世界盃準決賽萬眾期待，有線在備受輿論壓力下，用一元象徵式版權費跟無綫、亞視兩台簽訂播放合約，兩台最後以收有線聲、畫訊號，安排數碼頻道播放四場終極賽事。而無綫更積極配合宣傳，包括派出林峯、黎耀祥和15位候選港姐等，於明晚深夜假奧海城舉行嘉年華活動，相反亞視則採放棄態度零搞作。
由於無綫之前六十場世盃賽事均無得播，改播模擬入球之卡通片段，而遭到網民狂插及收得數十宗投訴，無綫為挽救頹勢，準備於周三凌晨開始出招，實行以聲會友，插播球評旁述聲帶，為自我保障，無綫同時與法律部研究有否牴觸。據無綫體育製作主任李漢源透露，無綫正動員全個工程部，進行技術處理一條專業球評旁述聲帶，由周三凌晨二時半進行的四強賽事荷蘭VS烏拉圭中開始插播，球評人選初步屬意資深評述員鍾志光、張國強等，另於世盃節目表現出色的嘉賓評述黃婉曼和李綺雯亦屬考慮其中。
不設後備節目播放
有線世界盃籌委會經理曾展章得聞無綫「偷雞」插聲，表示會高度關注及密切留意，一旦發現無綫違規，有線會立即截斷供無綫播世盃的訊號，事前不會作知會。曾說：「我都有聽聞無綫想咁做，就咁聽係違規，但我哋到時會睇實，無綫『偷雞』我哋咪Cut佢個訊號，（簽晒約喎？）無綫冇得播，亞視有得播嘛，有線已經照顧公眾利益！」
無綫冒險插聲，隨時被Cut畫面漆黑一片，問到李漢源可會有對策？他說：「Cut咪Cut囉，嗰個時段都係簽咗畀有線，我哋唔會有節目作後備播放，其實插得聲當然係法律容許先會做，條聲依家測試中，都要等法律部通過，星期一就知，（播埋有線廣告外，連宣傳有線都唔介意？）冇辦法，我哋都要接受。」
黃婉曼冇信心主持
問到黃婉曼可有興趣擔任球評？她說：「未必有咁叻，球評太專業嘞，我冇信心勝任，其實我啲時間都畀晒apm個世界盃活動同埋無綫，但我都有興趣，不過要等我叻啲先，下屆啦！」至於兼任撰寫球評的李綺雯表現得甚有興趣：「都有聽公司講，可以畀多個選擇觀眾，如果做旁述，我都想試，我會做足資料搜集，因為講波係靠臨陣反應，千鈞一髮，唔可以錯。」
文：影視組