洪卓立珍惜健康重生振作
洪卓立（Ken）去年因肺積水復發留院，被迫停工休養一段長時間。早前Ken病愈復出，並推出新專輯，他不諱言有「重生」感覺，會更愛惜自己身體。
去年農曆新年，Ken經歷了人生重大考驗，他因肺積水復發要留院，期間更出現惡化迹象，被迫停工休養。經過一年多休息，Ken終於復出投入工作，早前推出《Taste of Love新曲+精選》專輯，外界反應不俗，證明fans沒有離棄他。
心痛家人擔心
回想過去一年的臥病生涯，Ken表示：「有時辛苦到攞杯水飲都痛，因為keep住唔埋傷口，好多生活細節都要由屋企人分擔，最辛苦係媽咪，好似返工咁日日嚟探我。（你有冇喊？）有，不過唔係因為擔憂前途，反而係我心痛屋企人擔心我。」
Ken又謂家人曾擔心他病愈後復出：「佢哋冇講出口話叫我唔做。（有冇諗過放棄？）曾經諗過，因為成日令家人擔心。（咁做乜？）諗過做番地產。但有日諗起屋企人、公司同事以及fans對我咁好，又花好多心機喺我度，佢哋咁辛苦拚搏，我反而喺屋企亂諗嘢，覺得自己好尷尬同慚愧！既然公司再畀機會我，點解要放棄呢？而且我真係好鍾意唱歌。」
湯怡探望安慰
Ken坦言復出後有重生感覺，他說：「重生之餘又有種陌生感覺，因為對鏡頭或做訪問有啲唔慣，同埋諗唔到咁多嘢講。不過要多謝公司安排啲騷畀我，等我慢慢習慣，依家真係好好多。」問到緋聞女友湯怡有否慰問？他說：「有呀，好多人都嚟探我。」