李詩韻為慳皮撈埋清潔

李詩韻與鄧健泓戀情告一段落，愛情失意的她寄望「商」場得意，早前投資過百萬搞化妝學校，上月底已開張，不過升呢做老闆娘的她，凡事親力親為，連日來都留守新舖打點。據知，化妝學校原定投資約八十萬，但首次做生意的詩韻因要求高，事事要力臻完美，至「埋單」始發覺超支，投資要過百萬，為了減低成本，出身富裕家庭的詩韻為了慳錢，不惜落手落腳，在舖頭連瑣碎清潔事務都撈埋，有錢女變身「阿四」。

做完阿四去入貨

日前，記者發現詩韻在舖頭打掃，見她更拿起地拖瞓身拖地，雖然有點雞手鴨腳，最後總算打掃得一塵不染，之後，她還去倒垃圾，忙到一頭煙。做了一小時「阿四」，詩韻完成舖內工作，即急急換衫出外為舖頭添貨，她抵達一間髮飾批發店，即入舖內格價，最後買了一個假人頭以及一支腳架，之後再到其他店舖買日用品、化妝書等，才論論盡盡地拿着一袋二袋返舖頭，由於沿途有不少途人認出她，為免出洋相只好急急腳返回舖頭，老闆娘確不易為。

倒埋垃圾

又搬又抬

事事要親力親為

就舖頭嚴重超支一事致電詩韻，她承認此事，但否認要開源節流：「今次係我第一次做生意，所以特別緊張，好多嘢都想親自落手落腳做，好似揀舖位、請人到買化妝品、化妝材料，總之有關舖頭嘅嘢，自己做到嘅，我都會自己做番。」 文：影視組

掃塵抹鏡	有錢女李詩韻落手落腳拖地，做到身水身汗。