側田軒仔騎呢舞得髀
張敬軒、側田和林宥嘉前晚舉行拉闊音樂會，眼見「過江龍」林宥嘉大受觀眾歡迎，軒仔和側田惟有聯手變陣大跳拉丁舞搶鏡，鬼馬側田除了做出伸脷、扭籮及跣地動作，更摸軒仔大髀，成功搶回不少風頭。
前晚軒仔、側田和「星光四少」之一的林宥嘉（Yoga）相繼出場，互唱對方歌曲打開序幕。過江龍Yoga每次出場，觀眾反應最為熱烈。為了不被搶風頭，當軒仔獻唱《相對論》時，側田突然上台大跳拉丁舞，兩人不惜展示騎呢舞姿，high爆的側田做出伸脷、扭籮及掃軒仔大髀，最後更雙腳跣低跪在地上。當側田將整個身子挨在軒仔手上，軒仔嫌棄大叫：「你真係好鬼重！」
擔心被劫色
音樂會結束後，軒仔自爆拉丁舞環節是即興表演，又指Yoga平時少出聲，但一上台即嚇人一驚。軒仔說：「佢上到台好似變咗另一個人，我真係年紀大！佢好有活力，好在有個田叔喺後面頂住！」演出期間，有歌迷上台送劍蘭花給軒仔，軒仔接過後即說：「劍蘭都有？清明啱晒！」事後軒仔補充：「我上年都收過黃菊同白菊，可能歌迷覺得呢啲花襟擺襯我啩。」
軒仔自爆住所被勒令清拆僭建圍牆，由於住所附近治安差，笑言擔心被劫色。問到擔心自己還是「同居密友」關智斌被劫？他笑言：「我依家一個人住，仲兩個人住想死咩！」
羨慕林育羣
另外，Yoga表示很榮幸與軒仔、側田兩位前輩合作。對於軒仔指他上到台恍如變了另一個人，Yoga說：「平時不太緊張時會很放鬆，但上到台一緊張就會跑來跑去減壓。」對於林育羣（小胖）有機會到美國演出，Yoga非常羨慕。他說：「台灣人能夠在西方人面前表演很cool又驕傲，希望他可以得到格林美獎。（跟小胖PK？）我英文不行，很差！」
文：音樂組