姚佳雯眼淚控訴冇出賣顏子菲
姚佳雯、鮑起靜（鮑姐）出席母親節活動，姚佳雯一見鮑姐，即時攬着她喊，更委屈表示顏子菲與導演搭上一事並不是她爆出來，又反問：「我係唔係應該要假啲？」被指多事的她，受盡委屈，更不諱言曾遭「質問」。
亞姐顏子菲與已婚導演謝松軒搭上，事件令二人賠上前途。昨日，與子菲同住宿舍的姚佳雯出席活動時，突「變臉」攬着鮑姐喊，狀甚委屈，嚇到鮑姐不停問她甚麼事，事後佳雯否認被公司「照肺」：「我又唔係第三者，做乜照我肺！都影晒相，唔關我事，怕講多錯多，唔該各位畀我走啦！好多人覺得我講得太多，我性格太真，係唔係應該假啲？（同子菲姊妹情不再？）唔係！同佢係好朋友，要講我一早講咗，唔會喺下面（意指背後）玩嘢！（側邊人話你多事？）有囉！」
冇哭訴亦冇斬纜
佳雯又指子菲現時心情ＯＫ，其工作會停至六月一日，說到子菲合約到七月便滿，她說：「尋晚都有同佢傾偈，佢話公司繼續簽合約會簽，唔係就返加拿大讀書。（佢有冇話同個導演斬纜？）冇，（佢有冇喊？）冇！（對佢失望？）唔好咁講，唔知乜嘢說話講得、乜嘢唔講得。」而記者問她與阿軒是否很熟時，佳雯斬釘截鐵的謂：「唔係！都係打吓招呼咋！唔想攬屎上身，我之前嗰句說話係真，父母都係因為第三者離婚，呢啲家庭嘅小朋友點諗大家知，唔使點講。」
王希瑤頂替工作
此外，亞視高層鄭偉強指同事已聯絡子菲，覺得她沒有悔意、沒有道歉，而原本子菲做的《家在中國》會改為王希瑤頂上，記者致電希瑤，她表示公司只叫她盡快返來，並沒有講原因，及後知道事件，記者問她覺否子菲破壞亞姐形象，她說：「都唔知點講，畀多啲時間佢，佢係一個好女仔，希望可以堅強啲。」
此外，鮑姐坦言現時年輕人開放，但不應影響家庭，其父以前都很風流，幸而浪子回頭，她坦言都會勸子菲及阿軒。鮑姐又稱女兒現時於倫敦，只希望適婚年齡的她可早日生ＢＢ，更不介意囡囡生ＢＢ才結婚。
文：影視組