甄妮七級半巨胸震撼克勤

一連四場的《甄妮愛SHOW Farewell World Tour》最後一次演唱會前晚於紅館開鑼，吸引呂良偉夫妻、亡夫傅聲媽咪及親友捧場，甄妮全晚換上六套由囡囡Melody親手設計的性感舞衣配巨鑽，閃爆紅館，其中Deep V長裙更開到落肚臍，露出南北半球，更有Tube Dress迷你裙，身材Fit爆的她囂爆說：「唔介意公開我依家57歲，我怕咩？邊有人Keep得我咁好。」

握手寸歌迷

甄妮一口氣唱出八十年代的電視劇主題曲，並提起亡夫傅聲，她說：「77年嫁畀聲仔，當時冇諗住唱歌，好想快啲生BB，點知搞極都唔得好失望，好多次都係假嘅，喺失意時無綫就搵我唱電視劇主題曲。」當與歌迷握手，甄妮狂寸歌迷：「你細我一年？個樣仲老過我。」期間收到奶奶的利是。

當嘉賓李克勤出場，甄妮詐嬌說：「成日喺TVB見到你，你都唔約我飲茶。」克勤笑說：「唔使見到我就講TVB。」兩人互笠高帽後，甄妮踢爆曾遭大牌歌手以「唔得閒」拒絕做嘉賓，又表示自己只有巨胸，沒有巨肺，抵死的克勤說：「我唔敢答，曾經睇你首《七級半地震》MV，當時我血氣方剛，好震撼。」甄妮說：「你流鼻血？」克勤準備返後台，甄妮又狂寸：「快啲走，唔好搶晒我啲觀眾。」

甄妮不留情狂寸劉家昌怕老婆。

甄妮大讚克勤爽快回覆答應做嘉賓。

得罪好多人

另一嘉賓劉家昌獲甄妮吻面頰後，即用手抹去唇印，甄妮取笑說：「怕老婆？」又搞Gag說：「今晚我為你設計咗呢件衫。」劉家昌望住對方的「雙峰」重複說：「我看到。」甄妮又嘲笑對方老行路要小心，並有感而發謂：「我講嘢唔識修飾，所以得罪好多人，搞到好多敵人追擊自己，其實最緊要開心。」甄妮又在台上催促Melody快點生BB，她說：「希望生個孫畀我，好唔好呀Melody。」

採訪：音樂組