Rainbow封胸轉型賣唱

去年憑水着寫真上位的Rainbow，從不介意大晒胸前「事業線」，更曾落力與性感尤物周秀娜爭一日之長短，但Rainbow近日竟聲稱從良不再性感，更決意轉型當歌手，令人摸不着頭腦。

「性感應在骨子裏」

早前，本報有幸獲Rainbow在「從良」前大破色戒，大晒「升胸」效果，Rainbow笑言：「其實呢啲效果只係視覺上啫，可以做出嚟，不過上圍係豐滿咗，可能仲有得發育啦，因為我得十八歲咋！」她又稱行性感不會長遠：「性感應該喺骨子裏，唔係淨係靠剝就可以性感一世，不過若唔趁青春留倩影真係好嘥，所以我會影啲健康性感嘅相。」

Rainbow又謂經一年深思熟慮後，深明性感不可行一世的道理，於是她打算轉型：「唱歌、拍戲、舞台劇都想試，依家有機會唱歌，我一定會把握機會唱好啲！其實我都好驚唱得唔好，所以我最近都不斷練歌，又會養好把聲，希望唔會出醜，一定唔會做『胡走音』！」

回饋社會一生無憾

一向對做生意有興趣的Rainbow，也希望日後可踏上狄娜之路從商，更自誇數口好精：「如果可以好似狄娜姐姐一樣，做生意做得咁出色，仲可以回饋社會，咁我就一生無憾喇！」

文：專案組

攝：馬永堅