祖兒辣火頭 嘲阿詩奪衣着獎

何韻詩與好友容祖兒及過氣緋聞男友劉浩龍，昨日出席由BIG FOUR主持的無綫收費台節目《Big4大四喜》錄影，期間何韻詩、祖兒異口同聲表示對BIG FOUR尖銳提問會見招拆招。問到BIG FOUR最愛是誰時，許志安即指問題最合適已婚的張衞健回答，不過祖兒就插嘴指張衞健最愛舊愛江欣燕，令全場嘩然。

最叻神經刀亂噏

事後祖兒表示唔擔心激嬲張衞健，她說：「啲哥哥好錫後輩，好難得兩代同堂做節目，張衞健係我睇電視劇嘅偶像，佢哋全部係我欣賞對象，咁我真係覺得佢哋（與江欣燕）好襯。（怕唔怕被追問緋聞？）諗咗好多答案，有備而來，如果太尖銳會發揮神經刀亂噏絕招，我都有好多問題問番佢哋，例如湯寶如（梁漢文舊愛）嗰啲。」

BIG FOUR與祖兒、阿詩及劉浩龍將在節目中互揭陰私。

祖兒「口沒遮攔」，踢爆張衞健最愛江欣燕。

此外，祖兒對於與何韻詩、劉浩龍齊受訪表示不感尷尬，她說：「原本淨係我同阿詩，我提議搵埋劉浩龍，嗰時冇諗咁多，自己跣自己落陷阱。」問到日前阿詩在金像獎中奪最佳衣着獎，祖兒自言感到不值，笑指對方執正一次就攞獎。

健仔認有一夜情

何韻詩表示今次受訪，心情已豁出去：「反而師兄（劉浩龍）好驚，佢一星期前打嚟講，佢哋好似鬼，一定專揀驚嘅人嚇，反而我同祖兒心態懶懶閒，祝師兄好運。」此外，同場張衞健被追問有否發生一夜情？他大方認有，更表示當年十八歲，指初戀係由一夜情開始。 文：影視組