米雪忍淚致辭思念至愛
米雪昨日以未亡人身份，聯同尹志強（尹佬）家人、尹佬生前逾百位摯友及現場逾千五名球迷出席「尹佬惜別日 紀念足球賽」，共同緬懷這位「亞洲第一中鋒」璀燦無憾的一生。球賽結束後大批球迷仍不忍離開，不捨得與這位球場上的鐵漢就此訣別。
「尹佬惜別日 紀念足球賽」昨午於青衣運動場舉行，全場座位一早爆滿，球迷中包括老、中、青三代。身穿黑色素服，戴上墨鏡的米雪與全場人士為尹佬進行默哀後，大會播出尹佬生前片段，接着由余錦基、梁漢文、黃興桂、米雪致辭，米雪表示：「感謝各界人士嚟送別尹佬，佢喺另一國度都會感到大家對佢嘅愛，作為佢愛人，我為佢嘅成就感到光榮。」米雪致辭後，紀念賽正式開始，對賽的明星足球隊與南華精工聯隊，雙方球員均穿起代表尹佬的9號球衣。
「真係好掛住佢」
米雪談到致辭時心情複雜，她說：「我拎住稿紙致辭，我可以忍住（唔喊），唔拎一定忍唔到，我心情OK，尹佬好多朋友今日都有來，佢生前探訪過一個病童雖然已經過身，但佢家人都有來，仲有尹佬生前助養嘅孤兒都有出席，我知佢一定好開心。（睇尹佬片段點解笑？）睇到佢演戲，諗番佢演親戲都好驚，我就在旁教佢做戲。（有咩同尹佬講？）好掛住佢，真係好掛住佢，我感覺佢就喺身邊，因為我哋習慣咗唔係成日見，佢嘅精神一直喺我身邊，銀包一直放住佢張相。（尹佬骨灰會安放喺邊？）佢家人仲商量緊，（清明節會去拜尹佬？）屋企有位，依家日日對住佢，今日出門都有叫佢嚟睇。」
保存球衣逾廿年
米雪續說：「今日展覽嘅球衣Keep咗廿幾年，尹佬好慷慨，好多時有朋友想借球衣，佢都好幫手。（球衣Keep咁耐，你好長情。）係呀，我係長情。悼念冊入面有張相係隻狗，佢叫Happy，係尹佬買，尹佬走咗之後，隻狗都跟住走埋，我唔會再養狗。」
文：影視組