朱慧敏「小三」有出頭

感激前輩教導

港姐出生的朱慧敏，06年開始接拍無綫劇集，未知是否予人高傲感覺關係，最初經常獲派演「小三」角色，近年開始參演正面角色。對朱慧敏來說戲如人生，那怕要演惡女醜角，只要有機會，她都會全力以赴，做到最好。

04年港姐出身的朱慧敏，於06年開始正式拍劇。	朱慧敏大讚田蕊妮專業，從對方身上學懂不少處世經驗。	朱慧敏與男友分隔兩地，靠高科技維繫感情。

「最初我成日做人二奶，近年先開始演唔同角色。我一向好鍾意演戲，喺《點解阿Sir係阿Sir》入面我有場坐監戲，我相信我嘅角色狀態當時精神受煎熬，所以主動要求唔化妝，想畀觀眾真實感覺。最近播緊嘅《誰家灶頭無煙火》，我畀人嘅感覺又比較清新，本來長頭髮剪到去膊頭，目標係想畀人覺得朱慧敏係好有心機、做每個角色都好信服嘅演員！」

「每次同前輩好似毛舜筠、鄭則士同田蕊妮合作，我都會問多啲佢哋意見，點分析劇本，每次同唔同演員合作都學到好多嘢。前輩除咗守時之外，仲會好早到，好清楚每一場戲發生咩事，除咗學好演技，佢哋教識我睇事唔只從一個角度，會教我點分析，對做戲、成長有幫助。咁多個演員入面。黎耀祥係一個我好欣賞嘅演員，我哋合作過《畢打自己人》，佢嘅演技同做人處事方式都值得我學習！佢教我要學做戲，就要了解多啲人生係咩！我最初唔明，後來領悟到戲如人生，戲由人嘅生活而來，了解人生係咩，每個人嘅性格，演出嚟就會立體啲。例如一個人喊，究竟係委屈咁喊，定係笑住嚟喊？」

帶給觀眾歡樂

除了在電視發展，朱慧敏在電影界亦嶄露頭角，於多部港產片小試牛刀。她發覺自己愈來愈有喜劇細胞，期望有天可參演娘家製作的賀歲片，帶給觀眾無限歡樂。

「之前演過《竊聽風雲》同《得閒炒飯》，喺《得閒炒飯》入面我做周慧敏同事。機緣巧合下，近來有份參演由許鞍華執導嘅電影《桃姐》，我好希望可以多啲喺電影發展。電影同電視好唔同，電視嘅演技要好明顯，電影就愈自然愈好。電視多用對白交代，電影就冇咁多對白。無綫之前嘅賀歲片好似《72家租客》、《我愛香港》我都有睇，都希望可參與，有同公司爭取，無奈夾唔到期。我自己好有信心演喜劇，我向來外形畀人感覺cool、適合做女強人角色，但我真人都有搞笑一面！拍完《畢打自己人》之後，監製話我好有喜劇細胞，我希望可以畀觀眾睇到！演技成熟後，希望咩嘢類型角色都可以控制到。」

婚後堅持工作

作為現代女性，朱慧敏坦言將來結婚，除了想做幸福少奶奶外，都會堅持繼續工作。雖然現時她與台灣男友分隔兩地，但慶幸科技拉近二人關係，實行少聚多滋味。

「冇咁快會結婚，希望做多幾年先，有啲女仔結咗婚想喺屋企做全職家庭主婦，我就唔會！我好享受工作滿足感、成功感，完美人生對我嚟講，有家庭、有愛情、有朋友、有事業。演戲係我自細夢想，希望可以係終身事業。就算唔演戲都會做嘢，都唔想同社會脫節。現今女性都有好多角色，都係朝住呢個目標努力！」

「依家同男友關係穩定，學識製造浪漫，大家追求嘅唔係物質，係追求心靈上好平靜、好和諧嘅關係。雖然分開兩地，好在網絡發達可以用視像溝通，大家幾時見面視乎工作情況，盡可能佢會嚟香港，我都會去台灣。有時心靈上嘅互相支持比日日見面更重要！」

文：韋芷茵　攝：沈健程　髮型：Terrence@hair　化妝：Jan@Annie G Chan　場地、服裝：TWIST@中環