姚子羚忌提與錢國偉戀事
先後與姚子羚、陳自瑤、戴夢夢等傳緋聞的「風流監製」錢國偉（Wilson），上周與陳志雲因涉嫌貪污而被拘捕，有指錢經常對女藝人熱情，又曾公開承認追求過姚子羚。
記者致電向姚子羚求證，她表示知道錢國偉被拘捕一事，雖然有SMS對方，但未獲回覆。問她覺對方貪錢嗎？她說：「佢唔係啲咁嘅人，我係好多謝佢，可以入到呢行都係因為佢，如果唔係佢搵我拍《四葉草》，都冇機會拍劇，佢好專業，教識我好多嘢。（乜嘢？）做戲囉。（佢有冇追過你？）之前嘅嘢唔想再講，展望將來，希望佢會冇事。（啲人話佢好風流？）我冇見過佢拍拖，佢嘅私生活我唔清楚，工作上就覺得佢十分有創意。」
至於兩年前曾出席Wilson生日派對的龔嘉欣，力撐對方為人絕無問題：「肯定佢冇對我摸手摸腳，亦冇搵我去過飯局。（佢生日你有冇送禮？）冇，識我嘅人知我唔送禮，一送一收好嘥氣。」