阿嬌友情客串海報唔見樣
導演劉鎮偉昨日率領梁詠琪及鄭中基為新片《越光寶盒》舉行借票拜神儀式，現場的電影宣傳海報唔見鍾欣桐（阿嬌）個樣，與早前所發布的不一樣，電影公司方面表示是阿嬌所屬的英皇不希望他們登出來。記者就此事詢問阿嬌的經理人霍汶希，她解釋：「我哋同呢部電影簽訂合約時都講明係友情客串，亦都冇話可以印阿嬌個樣喺海報上，佢哋未經同意印咗落去所以先要抽起。」梁詠琪則戥阿嬌被抽離海報可惜，但她相信與內地批文無關。
至於鄭中基則表示自己正在增肥，是否為結婚？他說：「唔係，為套新片啫，結婚啲嘢唔講！」問到會否捧場睇女友蔡卓妍的演唱會？他即問記者是幾號舉行：「未知去不去，就算去都會大大方方。」而劉鎮偉對於阿嬌名字在海報中被抽起感愕然，表示會了解一下。