Twins影壇合體袋千萬爭古仔
Twins合體回歸樂壇後，將於四月十六、十七日在紅館舉行兩場演唱會，內部訂購反應熱烈，已超過數千張飛爆晒額，英皇正考慮加場。而王晶亦出價近千萬邀孖妹拍電影，誓飲她們合體復出頭啖湯。
過往Twins是唱片、電影搶手貨，如今阿嬌（鍾欣桐）復出，Twins合體令渴望見她們的fans十分開心，而「Twins人人彈起2010演唱會」亦不斷搶飛，現在內部訂購已超額數千張飛，英皇娛樂考慮加場，但據說場期所限，現正商議中。
王晶開魔幻喜劇
此外，王晶亦大力支持，找她們夥古天樂主演一套喜劇電影，片酬十分之高。王晶承認找Twins開戲：「呢套係古天樂繼《大內密探靈靈狗》後再開嘅戲，我覺得好啱佢哋做，又唔想次次演員都類同，想配搭新鮮啲，咁啱Twins又一齊出番嚟，impact都幾大。」他透露戲名為《阿拉甲》，是魔幻特技片，阿Sa（蔡卓妍）、阿嬌在戲中都深愛古天樂，一個演仙女，一個演凡人，電影四月開拍。是否以過千萬邀孖妹演出？王晶說：「未到，但都唔少啦，總之未試過咁高。（咁阿嬌內地解封有冇關係？）各方面因素都有啲，當然內地市場是一個最重要嘅原因，況且用咗佢好多次，試吓兩個一齊用！」
多謝咁多人支持
Twins知道演唱會訂飛反應熱烈，又得晶哥支持，大感開心，她們說：「好開心咁多人支持我哋，總之我哋唔會辜負歌迷嘅厚望，會傾盡全力去演出。」
文：音樂組